Cabugao, Ilocos Sur – Maysa ti Cabugao Institute, Cabugao Ilocos Sur kadagiti pageskuelaan-sekundaria iti Umuna a Distrito ti Ilocos Sur ti nakagun-od ti programa a Computer Hardware Servicing (NC 2), Competency Based Training Work Station babaen ti panangiwayat ti Technical Education and Skills Develoment Authority (TESDA) a paset ti proyekto da Congressman Ryan Luis V. Singson ken ni TESDA Director General Joel Villanueva partikular iti First District, Ilocos Sur ken para pay iti sapasap.
Nangrugi ti panagklase ti 25 nga agad-adal ket manamnama a maileppasda ti 356 oras (45 Aldaw) iti adalenda agingga iti katengngaan ti Mayo 2012. Segun ken ni Mrs. Marivic R. Siruno, Instructor ti panagadal, uppat nga oras ti panagklaseda manipud Lunes agingga iti Sabado. Ngem iti bulan ti Abril, agmalmalemton ti klaseda. Innayon ti Instructor a maitarapnos a masursuruan iti Personal Computer Operation (panangammo ti mangoperar ti computer/desktop) kadagiti agadal nga awan pay pamalpalatpatanna nga agusar ti computer.
Innayon ni Mrs. Siruno a kalpasan a maileppasda ti adalda, maaramidto ti Assessment babaen ti TESDA ken maikkan ti Sertipiko dagiti nagturpos a nagadal.
Imbatad met ni Mr. Romeo Solar, Assistant Principal ti Cabugao Institute nga agtultuloy daytoy a programa babaen ti panangsuporta ni Diputado Ryan ken agyamanda ta nairusat ti pannakasursuro/pannakaisaknap daytoy a paglaingan para kadagiti umili ti Cabugao, IIocos Sur. # (Web In-Action)
 |
| Ni Mrs. Marivic Ramento Siruno, Instructor ti Computer Hardware Servicing (NC2.) |
 |
| Ni Mr. Romeo Solar, Assistant Principal ti Cabugao Institute |
No comments:
Post a Comment