Cabugao, Ilocos Sur – Naaramid ti panagmula ti mangrove seedlings (5,000 a kapuon) babaen kadagiti Barangay Tanod (BPATS) a binayabay da Brgy. Captain Edgardo S. Cobangbang, Sr. ken ni Mrs. Milagros R. Paz, Municipal Fishery Coordinator iti aplaya idiay Brgy. Sabang, Cabugao, Ilocos Sur idi Marso 18, 2012.
Paset daytoy ti Memorandum of Agreement (MOA) iti nagbaetan ti Bureau of Fisheries and Aquatic Resources (BFAR) ken ti Local Government Unit (LGU)-Cabugao a pinirmaan da BFAR Regional Director Nestor Domenden ken ni Mayor Edgardo S. Cobangbang, Jr. a pannakamula ti mangrove kadagiti mabalin a pagmulaan iti igid ti kabaybayan dagiti Coastal Barangays ti ili a pakaibilangan ti Barangay Sabang.
Umabot ti 11 a Barangay Tanod (BPATS) ti nagmula. Paset ti katulagan ti P2 kada kapuon ti gunggona ti agmula ti mangrove seedling ket kalpasan ti makatawen, sabalinto manen a kontaran ti maited a gunggona iti nagmula.
Segun ken ni Mrs. Paz, paset daytoy ti sustenable a pannakaipatungpal ti panagmula ti mangrove a nayon a santuario (pagaponan) dagiti ikan ken dadduma pay a nabiag iti baybay. Makatulong pay dagitoy a naimula a sagiped ti naapres nga allon a mangtiped ti panagkurukor ti kadilian ken ti igid ti baybay. # (Web In-Action)
No comments:
Post a Comment