Tuesday, December 20, 2016

MANNALON TI BRGY. RIZAL, IMMAWATDA TI GANAGAN

Cabugao, Ilocos Sur – Naaramid ti pannakaited   ti libre a ganagan para kadagiti mannalon iti Barangay Rizal, Cabugao, Ilocos Sur idi Disiembre 19, 2016. Naiyallawat  dagiti ganagan iti sango ti Barangay Hall ti  nadakamat a barangay kadagiti mannalon. 


Indauluan ni   Mayor Josh Edward S. Cobangbang dagiti naggapu iti Munisipio a pakaibilangan dagiti Staff ti DA-LGU Cabugao nga imatonan ni Municipal Agriculturist Robert S. Savella  iti  nangimatang iti pannakaiyawat kadagiti mannalon iti nadakamat a barangay nga idauluan  ni   Brgy. Captain Thaddeus U. Soller ken nagatendaran  met dagiti Opisiales ti Barangay ken iti Asosasion ti mannalon kadaytoy  a nadakamat a barangay. 



Iti Mensahe ni Mayor Josh Edward, kimmablaaw ken nagyaman ket kunana nga agtultuloy daytoy a programa a para iti pagsayaatan dagiti mannalon ti Cabugao ken kaikarian dagiti mannalon iti maikkan ti tulong gapu ta isuda ti mangakem iti produksion ti pagtaraon.



Innayon ti Alkalde Munisipal nga  agyaman ta mataginayon  dagiti mannalon iti tunosda ken panangpatibkerda iti sektor-da a kakammayet ti LGU a mangidur-as iti agrikultura.  



Kabayatanna, impeksa dagiti mannalon ti  ragsakda   a kaduada dagiti Opisiales ti Barangay ken Aosasion-da iti nadakamat a  barangay iti  naan-anay a  panagyamanda iti Gobierno Munisipal nga idauluan ni Mayor Josh Edward ken iti agtultuloy a pannakatarabayda.



Daytoy a gannuat ket paset iti prayoridad a  programa iti pannakaidur-as ti Benneg ti Agrikultura iti LGU-Cabugao   nga idauluan ni Mayor Josh Edward S. Cobangbang tapno matulongan  ti sapasap a mannalon iti inda manen panangmula para iti Dry Season 2016-2017 (Nobiembre-Mayo). # (Web In-Action)

No comments:

Post a Comment