Wednesday, December 7, 2016

RELEASE TI GANAGAN IDIAY BRGY. BUNGRO, NAARAMID

Cabugao, Ilocos Sur – Naileppasen   ti pannakaited  ti libre a ganagan para  kadagiti mannalon iti Barangay Bungro, Cabugao, Ilocos Sur iti  bigat ti Disiembre 7, 2016. Naiyallawat  dagiti sako ti ganagan kadagiti bumarangay (Farmer ID Card Holder)   iti sango ti  Barangay Multipurpose Hall kadaytoy  a nadakamat a barangay. 


Indauluan ni Mayor Josh Edward S. Cobangbang ken dagiti Staff ti DA-LGU Cabugao nga imatonan ni Municipal Agriculturist Robert S. Savella  iti nangiyallawat kadagiti abuno kadagiti mannalon iti nadakamat a barangay nga idauluan  ni Brgy. Captain  Fermin Sarinas. Nagatendar met dagiti Opisiales ti Barangay. Kasta metten dagiti kameng ti Asosasion ti mannalon nga idauluan ni Farmers Association President Eddy L. Sevilleja.

Iti mensahe ni Mayor Josh Edward, inapresiarna  iti kinatunos dagiti Opisiales ti Barangay ken Mannalon a makidanggay iti Munisipio a mangipatungpal kadagiti programa ken proyekto ti Munisipio ken dadduma pay nga Ahensia a kas iti DA a  makaited iti pagsayataan dagiti lumugar ken dagiti mannalon.


Kuna ni Mayor Josh Edward nga agyaman unay kadagiti agtultuloy a talek ken pammati dagiti mannalon iti Gobierno Munisipal ket makomplementaran dagitoy  a kinaregtada  iti Sektor-Agrikultura babaen kadagitoy a maited nga inputs a nayon iti usarenda iti produksion. 

Kinomendaran pay ti Alkalde Munisipal iti regta dagiti mannalon a mangpatibker iti sektor-da nga agpataud iti pagtaraon iti sapasap ket kaikarianda latta iti maikkan iti pannarabay nga aggapu iti Gobierno Lokal. 

Kabayatanna, impeksa met  dagiti Opisiales ti Barangay ken dagiti mannalon iti Barangay Bungro iti  naan-anay a  panagyamanda iti Gobierno Munisipal nga idauluan ni Mayor Josh Edward ken iti agtultuloy a pannakatarabay-da   babaen kadagiti pannakabagi ti DA-LGU Cabugao.

Daytoy a gannuat ket paset iti prayoridad a  programa tapno maidur-as ti Benneg ti Agrikultura iti LGU-Cabugao   nga idauluan ni Mayor Josh Edward S. Cobangbang ken matulongan  dagiti sapasap a mannalon iti inda manen  panagmula para iti Dry Season 2016-2017  (Nobiembre-Mayo). # (Web In-Action)

No comments:

Post a Comment