Thursday, December 8, 2016

WELDING SKILLS TRAINING, DANDANI METTEN MAIWAKAS

Cabugao, Ilocos Sur -  Malmalpasen  ti panagsanay  iti Welding Skills Training  iti 19 a Trainees a naggapu iti nadumaduma a barangay ti ili a Cabugao, Ilocos Sur iti Cabugao  Cultural and Sports Complex nangrugi idi Nobiembre 9, 2016 ken manamnama nga agpatingga iti Disiembre 2016.

Ti panagsanay ket agpaut iti 26 nga aldaw, segun ken ni Mr. Mark Lester Acdan, Trainor manipud iti Igama Colleges Foundation, Inc., Badoc, Ilocos Norte.


Daytoy a rusuat ket ipatungpal ti LGU-Cabugao babaen iti BUB Program  ken iti Technical Education and Skills Development Authority (TESDA)-Vigan City ditoy Cabugao kadagiti indibidual nga agduyos a mangpadur-as ti kabaelanda kadagitoy a teknikal a maiyadal a kasapulan iti lokalidad iti agdama.

Nagbisita ni Mayor Josh Edward S. Cobangbang kadagiti agsansanay iti uneg ti Sports Complex iti Disiembre 8, 2016 ket kimmablaaw ken nagyaman  kadagiti Trainees ta segun iti Trainor ket namantener dagiti 19 a Trainees ti pannakiramanda iti panagadal iti Teoria ken Aktual.


Innayon pay ni Mr. Acdan  nga addadan iti maika-22 nga aldaw ti panagsanayda. Kunana a napintas ti gapuanan dagiti Trainees iti welding joints ken addada ita iti groove welding vertical position a mangsanay kadakuada iti napulido a gapuanan.

Insupusop ti Trainor nga agdalan iti X-Ray Machine iti gapuananda no kabaelanda a maipasa iti pagrukodan iti Assessment sakbay a maited kadakuada iti NC II iti TESDA.

Kinuna ni Mayor Josh Edward a kasapulan met nga ipasnek dagiti agsanay tapno naan-anay a mapadur-as  ti kabaelanda yantangay ta kabukbukodanda dayta a masursuroda  ken  maalada a  pangpasayaatda iti panagbiagda. 


Insupusop ti Ama ti Ili a kitkitaenda met iti Munisipio dagiti maitulong kadagiti agsanay tapno maikkanda iti naan-anay a  titulo a kas iti NC II a mabalinda nga usaren iti pannakaiyempleoda ditoy ken iti abroad kalpasanna. # (Web In-Action)

No comments:

Post a Comment