Friday, December 16, 2016

SIMBANG-GABI, NARUGIAN ITI DISIEMBRE 15, 2016

Cabugao, Ilocos Sur – Nangrugi ti Misa Aguinaldo  iti Disiembre 15 agingga iti Disiembre 23, 2016.

Iti Parokia ni San Markos Ebanghelista ti ili a Cabugao, Ilocos Sur, naregta ni Rev. Fr. Felix Costales a mangan-annong kadagiti Nasantuan a Misa a mainaig iti panangpasungad ken panangselebrar iti panawen ti Paskua 2016 ditoy ili ti Cabugao.

Iti 6:00 PM iti Disiembre 15, 2016, nairugi ti nalatak a “Simbang Gabi” ket naituding iti eskediul a panagsindi ti kandela/agkararag  dagiti Deboto kadagiti nadumaduma a  sektor ti kagimongan manipud kadagiti 33 a barangay ti ili ket maangay iti Simbaan Katoliko iti Poblasion ti nasao a Misa.

Kasaruno  daytoy, naangay met ti Misa-Parbangon  nangrugi iti Disiembre 16-24, 2016 ket mayeskediul nga aramiden ti  9 a Clusters dagiti deboto iti agsindi iti 
kandela/agkararag  manipud iti 33 a barangay a pagnaedan dagiti Deboto. Maaramid ti nasao a Nasantuan a Misa iti Simbaan Katoliko ditoy Poblasion ti Cabugao.

Iti sabali a bangir, umarngi met laeng ti aramiden dagiti Deboto iti Iglesia Filipina Independiente (IFI Church) iti Barangay Quezon, Cabugao a kas pangipalnaad iti pannakikaysada iti nasaknap a selebrasion iti pannakayanak ti Naindaklan a Mesias.

Maaramidto pay dagiti Misa iti Rambak Kaaldawan Paskua iti Disiembre 24 ken 25 idinto ta Rambak Baro a Tawen inton Disiembre 31 ken inton  Enero 1, 2017.

Kabayatanna, nakaeskediul a maysa ti Local Government Unit (LGU) ti Cabugao a mangesponsor iti Midnight Mass inton Disiembre 24, 2016.  # 

No comments:

Post a Comment