Friday, December 23, 2016

SUPPLEMENTAL FEEDING PROGRAM TI LGU, AGTULTULOY

Cabugao, Ilocos Sur – Agtultuloy ti Supplemental Feeding Program kadagiti Day Care Center kadagiti Barangay ti Munisipalidad babaen iti panangtarawidwid dagiti Child Development Workers (CDWs), dati a  Day Care Workers  nga agisursuro kadagiti Day Care Pupils  ken tartarabayen ti Municipal Social Welfare and Development Office-Cabugao iti panangidaulo ni Mrs. Lydia S. Gazmen, Municipal Social Welfare Development Officer.

Segun kadagiti CDWs, naited manen  dagiti abasto a bagas ken kanaigna a pagtaraon  para kadagiti ubbing iti kaaldawan ti panagklaseda (lima nga aldaw ti makalawas) iti unos ti innem a bulan iti masakupan ti 2016-2017. Tunggal Day Care Worker ket napan iti Munisipio a nagreport itay nabiit iti MSWDO  ket naited dagiti maitutop  a kasapulan dagiti ubbing nga isuroda iti panaglukat ti klaseda iti Tawen 2017.

Dagitoy nga inisiatiba ket resulta ti napintas a koordinasion  ti LGU-Cabugao ken ti DSWD Region 1  babaen iti agtultuloy a  suporta ti Gobierno Munisipal  nga idauluan ni Mayor Josh Edward S. Cobangbang tapno mamantener ti salun-at ken panagtan-ay  dagiti ubbing iti Munisipalidad ti Cabaugao. # (Web In-Action)

No comments:

Post a Comment