EVALUATION TI GAWAD SAKA NOMINEE DITOY CABUGAO

Cabugao, Ilocos Sur – Naangay ti Validation & Interview ti Gawad Saka Nominee for Outstanding Extension Worker, Mrs. Joenah G. Sevilleja, AT/DA-LGU Cabugao idi Setiembre 28, 2012 babaen ti grupo ti Gawad Saka Regional Technical Committee iti panangidaulo ni Ms. Rose Pastor, Rural Based-Organization (RBO)  Regional Coordinator ken Chairman, Evaluation Team. Naaramid ti Evaluation iti mismo nga Opisina ti DA-LGU, Municipal Building, Cabugao, Ilocos Sur  ket nakitaripnong dagiti nainterbiu a Kapitanes, Opisiales ti Mannalon, 4-H Club, mangngalap ken Personnel ti LGU-Cabugao a nagsaludsodanda.

Maibasar iti pakaammo ni DA OIC Regional Executive Director Valentino C. Perdido, Ph. D. ken ni Mayor Edgardo “Ediboy” S. Cobangbang, Jr., napili ken nainominar babaen  ti DA-Provincial Office  ni Mrs. Sevilleja ket  mairaman a mapagpilian kadagiti 7 nga Extension Workers a  maipaayan ti Gawad Saka Awards, Regional Level.

Panggep ti DA nga ikkan ti agas ti bannog dagiti agserserbi iti Ahensia a saan laeng nga iti benneg dagiti clientele no di pay dagiti Provincial Agriculturist, Municipal Agriculturist ken Agriculture Extension Worker a pakaibilangan ni Sevilleja  babaen iti pammadayaw a kaibatoganda. # (Web In-Action)

ATHLETIC MEET, NAANGAY ITI 4 A SONA TI DEPED-CABUGAO

Cabugao, Ilocos Sur – Naangay ti Athletic Meet ti 4 a sona ti DepEd Cabugao District idi Setiembre 28, 2012 iti nagkapat a disso ken arigna a naggigiddan a panagsasalip dagiti mangbukel a pageskuelaan kadayta a sona iti nadumaduma a pagsasalisalan  nga ay-ayam kas iti Volleyball, Chess, Basketball, Softball, Table Tennis, Sipa, Athletic, Soccer, Baseball, ken Badminton.
Naangay ti pay-ayam iti Brgy. Salapasap  ti Zone 1, Dardarat Elementary School  ti Zone 2, Cabugao South Central School ti Zone 3 ken Cuantacla Elementary School ti Zone 4. 

Sakbayna, naaramid ti programa ti tunggal disso  a nangrugi ti pay-ayam. Kangrunaan a naaramid iti programa ti panagparada ti delegasion ti  tunggal eskuela, naipresentar dagiti atleta babaen kadagiti dadaulo ti eskuela, ken naaramid ti Athletic Oath.

Nagmensahe ni Public Schools District Supervisor Helen V. Siruno ti kada sona ket kinaritna dagiti atleta nga aglalaingda tapno agballigida iti pakisalipanda. Dinakamat ti Opisial ti DepEd Cabugao District a daytoy nga exposure ti ubbing ket matubay ti disiplina, maipromot ti panaggagayyem ken manayonan ti panagtalek ti bagida ta mamuli ti talentoda.

Impeksa pay  ni District Supervisor Siruno ti panagyamanda iti DepEd Cabugao iti agtultuloy a panangsuporta  ti LGU Cabugao nga idauluan ni Mayor Edgardo “Ediboy” S. Cobangbang, Jr. kasta met ni  SB Member Vicky S. Serna, Committee Chair on Education iti Sektor-Edukasion  ta maysa a prayoridad a  programa ti Gobierno Lokal iti agtultuloy a pannakapasayaat dagiti  eskuela ken pannakaipromot ti  sports kadagiti ubbing ta  naipaayanda ti sports paraphernalia  iti nasao a  pay-ayam.

Ni PESS District Coordinator Ronel Ubaldo ti nangideklara ti pormal a panaglukat ti pay-ayam ti kada sona.

Kalpasan ti pannakaaramid dagiti nadumaduma nga events iti dayta nga aldaw, impakaammo ni Mr. Ubaldo ti partial a  resulta ti nagsasalip ti kada sona kas iti sumaganad: ZONE 1-Volleyball (Boys & Girls), Salapasap; Sipa-Reppa-ac; Badminton, Girls-Cabugao North CS, Boys-Pug-os ES; Basketball-CNCS; Soccer-CNCS; Athletics-Bungro ES; Chess, Girls-CNCS, Boys-Bungro ES. ZONE II- Volleyball, Boys-Salomague ES, Girls-Salomague ES; Chess, Boys- Board 1 Salomague ES, Board 2 Namruangan ES; Chess, Girls-Board 1 Dardarat ES, Board 2 Turod ES; Basketball-Sabang ES; (Softball, Table Tennis, Sipa-Daclapan ES); Athletics-Salomague ES, Namruangan ES, Dardarat ES; Soccer-Namruangan ES. ZONE III- Chess, Girls-Sagayaden ES, Boys-Nagsincaoan ES; Table Tennis-Cabugao South CS; Football-Pila ES; Baseball-Lipit ES; Softball-CSCS; Basketball-Sagayaden ES; Volleyball, Girls-Nagsincaoan ES, Boys-Cabugao South CS; Badminton-Cabugao South CS.

Innayon ni PESS Coordinator Ronel Ubaldo a maangay ti District  Athletic Meet inton Oktubre 16-17, 2012. (Web In-Action) 

BLESSING & INAUGURATION, RHU KEN LYING-IN CENTER

Cabugao, Ilocos Sur – Nakagasgasat dagiti umili ti Cabugao,Ilocos Sur ita nga aldaw, Setiembre 28, 2012 ta nabendisionan ken nainauguraran  ti singin a baro a  pasdek a pakaibalayan ti Rural Health Unit ken ti Lying-In Center: RODOLFO S. SONIDO LYING-IN CENTER a tinalantanan dagiti opisiales ti Gobierno Probinsial nga idauluan da Gov. Luis “Chavit” Singson ken Vice Gov. DV Savellano; kasta met iti LGU-Cabugao nga idauluan da Mayor Edgardo “Ediboy” S. Cobangbang, Jr. ken Vice Mayor Danny Q. Gazmen.

Kalpasan ti panglukat a Kararag ni Rev. Fr. Felix Costales, Kura Paroko ti Iglesia Romano Katolika, ginetteng ni Gov.  Chavit ti laso a mangipalnaad ti pannakaisibro dagiti baro a pasdek-salun-at  ket  immuna ti RHU Building sa binayabayda a simrek ti Padi a nangwaris ti bendision iti laem  dagiti pasdek.

Kalpasan ti pammendision, imbasa ni SB Member Dr. Carlito S. Pano, Committee Chair on Health ti linaon ti Resolusion  ti pammigbig  ti   Sangguniang Bayan nga inaprobaran ni Mayor Ediboy  ken  naiyawat ken ni Mr. Elpidio Sonido, pannakabagi ti Pamilia-Sonido a nangidonar ti kadakkelan a paset dagiti pasdek. Indauluan da Gov. Chavit ken Mayor Ediboy dagiti Opisiales ti LGU, Kapitanes, Pamilia- LGU, pannakabagi ti nadumduma a sektor, ken umili a nakitaripnong a nagturong iti Cabugao Cultural and Sports Complex tapno maseremoniaan ken mapasingkedan  ti pannakailunsad ti 100% Philhealth Cardholders ti amin nga umili ti Cabugao.

Kimmablaaw ni Gov. Chavit iti naruay nga umili a kaaduan ti naggapu iti barangay. Dinakamat ni Gov. Chavit ti pateg ti salun-at a programa ti LGU’s ket impannakkelna a babaen ti panagtinnulong ti Gobierno Probinsial ken LGU Cabugao  ket umuna ti ili a Cabugao a 100% Philhealth Card Holders iti Probinsia!

Impasingked met ni Vice Gov. DV Savellano nga adu ti programa ti health services a mabalin pay  a maipaay ket  kitaenda ken ni Mayor Ediboy dagiti  mainayon a  pagsayaatan  iti pannakataming ti salun-at dagiti umili ti Cabugao babaen ti tulong ti Gobierno Probinsial.

Napasingkedan ti sapasap a pannakasagrap ti benepisio iti Philhealth babaen ti panangited ni Area Vice President  Daniel  de Leon ti Philhealth, Northern Luzon  ken ni Mayor Ediboy iti P578,000 a Tseke. Imbatad ni De Leon a daytoy ket bunga ti napintas a panagkammayet ti Ahensiada ken ti LGU.

Pinagyamanan ni Mayor Ediboy da Gov. Chavit, Vice Gov. DV ken Philhealth Vice President Daniel de Leon ti pannakagun-od ti ili a Cabugao ti 100% Philhealth Cardholders. Innayon ti Alkalde Municipal a dakkel a pakalag-anan dagiti umili daytoy a programa a pannakaipamaysa ti pakaseknan ti salun-at.

Kanaig daytoy, maigiddan ita nga aldaw  ti Updating, Profiling ken Distribution ti Philhealth Cards kadagiti recipients iti 33 a barangay ti Munisipalidad iti Complex babaen ti panangiwardas dagiti Personnel ti nagtitinnulong nga  Opisina ti LGU- Cabugao. # (Web In-Action)

 

NABALLIGI TI FFS TI BRGY. PUG-OS

Cabugao, Ilocos Sur – Naaramid ti linawas a session ti Pug-os Farmers’ Association iti Farmers Field School-Learning Center-da iti Barangay Stage, Barangay Pug-os, Cabugao, Ilocos Sur a dinar-ayan dagiti Farmer-Learners ken pannakabagi ti DA-LGU nga idauluan ni OIC  Nereo S. Daproza, AT ti DA-LGU  idi Setiembre 27, 2012.

Imbatad ni Mr. Robert S.  Savella, Facilitator,  a nailektiur kadagiti mannalon ti pangrugian  ken panangatipa ti peste ken sakit ti pagay nupay awan pay  ti rimsua a sakit iti nairaep a pagay iti agdama iti Learning Field. Ti nasao a naimula a pagay ket nasalun-at ken  addan iti Dough Stage.

Manamnama a maangay ti Farmers’  Field Day iti nasao a proyekto ken programa ti LGU-Cabugao, ATI ken DA-RFU 1 inton Oktubre 17, 2012 iti mismo a Project Site iti Barangay Pug-os, Cabugao, Ilocos Sur. # (Web In-Action)