Cabugao, Ilocos Sur – Naulit manen ti pannakaala dagiti mangngalap iti pawikan (sea green turtle) manipud iti kabaybayan ti batog ti Barangay Namruangan, Cabugao, Ilocos Sur idi Setiembre 6, 2012 babaen kadagiti mangngalap iti Barangay Namruangan nga idauluan ni Brgy. Captain Robertson “Bongbong” Gorospe.
Imbatad ni Mrs. Milagros R. Paz, AT-DA LGU ken Licensed Fish Examiner a nakalapda ti pawikan iti 4:30 pm ket imbulosda met laeng iti 5:30 pm iti dayta nga aldaw iti imatang dagiti mangngalap iti igid ti baybay ti Barangay Namruangan.
Innayon ni Mrs. Paz nga agatiddog ti pawikan iti 89 centimeters idinto ta agakaba iti 74 centimeters. Kanaig daytoy, inapresiar ni Mrs. Paz dagiti mangngalap ken lumugar iti Barangay Namruangan ta nasanaydan a mangipakaammo iti autoridad no adda endangered species a makalapan wenno tumakdang ditoy a lugar.
Daytoy a pammalagip kadagiti agnaed iti Coastal Barangays ket paset ti nagkammayyetan a programa ti BFAR ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken ipakat ti MFARMC ken DA-LGU a pannakatagiben dagiti rekursos naturales iti kabaybayan ken pannakaprotehir dagiti endangered species a pagrebbengan a saluadan iti sapasap. # (Web In-Action)
No comments:
Post a Comment