Cabugao, Ilocos Sur – Agtultuloy ti maar-aramid a panagsemilia/panagbunubon iti Greenhouse a pakapatubuan dagiti nangato ti kalidadna a bukel ti nateng a mapatanor babaen ti pannakausar ti organiko a ganagan.
Iti agdama, nagbunubon dagiti kameng ti Pug-os Farmers Association a nakagun-od ti proyekto ti CPAR ti DA-RFU 1 nga idauluan ni Mr. Elmer Bromeo iti kamatis ken tarong iti tallo a kaaray (plot) idinto ta adda met dua a kaaray nga ingiddan manen ti DA-LGU nga idauluan ni Mr. Obas Bill Baclig, AT iti nasao met la a klase ti bukel kas panagsagana iti panagmumula ti nateng iti masungad a Dry Season Crop 2012-2013.
Kabayatanna, naapit metten dagiti naimula a pechay, papaya, kangkong, ken agkalatkat nga utong iti uneg ken ruar ti Greenhouse. Mabalbalin manen a maapit ti naimula a hybrid a kamatis ken paria a naganaganan ti organiko iti agsumbangir a ligason ti Greenhouse. Inaldaw dagitoy nga as-asikasuen ni Mr. Gerry Tapuro, katulongan/katalek ti Munisipio nga agtaripato ti mulmula iti Greenhouse.
Ti Greenhouse ket napataud babaen iti proyekto nga ingannuat ti High Value Commercial Development Program (HVCDP) iti DA-RFU 1 ken Gobierno Munisipal nga idauluan ni Mayor Edgardo S. Cobangbang, Jr. tapno adda pagpatubuan ken pagpatan-ayan dagiti nangato ti kalidadna a cash crops a kas iti nateng ken kaarngina ket maiyallatiw ti wagas ken teknolohia ti pannakapatanorna kadagiti mannalon tapno mapadur-asda ti panagmulada ti nateng ken dadduma pay a mangnayon iti masapulanda a pakairanudan ti sapasap nga umili. # (Web In-Action)
No comments:
Post a Comment