Cabugao, Ilocos Sur – Naulimek ngem nabaked ti gapuanan dagiti mangisursuro ken ubbing iti Pug-os Elementary School nga idauluan ni Miss Mildred M. Naval, Head Teacher III iti tay-ak ti akademiko ken kanaigna nga aktibidad iti pagsayaatan ti eskuela .
Maysa kadagiti maipagpannakkelda ket ti zero waste management-da ta malaksid a maidalimanek a naimbag ti basurada ket mapagbalinda dagiti plastic ken cellophane a pakairanudan imbes a pakadaksan ti aglawlaw.
Iti pannakiuman ti Web In-Action ken ni Miss Naval idi Setiembre 27, 2012, imbatadna nga iti Coal Paper ti kaudian a diskubreda nga aramiden. Matudingan ti Grade 4, 5 ken 6 nga agisubmiter ti sag-10 a tinukel ti daddadakkel ngem itlog a napatangken a papel. Innayon ti Head Teacher a kas iti uging ti kasamayna a pagluto daytoy a diskubreda.
Malaksid itoy, nagduduma pay dagiti partuatda a pagimbagan a patauden ti wara ti Tetra Pack ti Funchum kas iti waste paper basket, vases ti seedlings imbes a damili a magatang, nagetteng a maisaleksek ti cushion a pungan imbes a kapas, ken dadduma pay a recycled projects nga ipadawatda ti bisita ken pangar-arkosda iti uneg ti Room-da ken idiay balay dagiti ubbing.
Gapu iti napintas a tunos ti mangidaulo, titser, ubbing, nagannak ken lumugar, nagun-odda manipud iti LGU ti tulong a pannakaatep ti School Stage, Extended Roofing ti Bagong Lipunan Building ken PMS Aquino Building.
Iti agkadinamag a Zero Waste-da ket nagbisita ni DA Regional Technical Director ti Agriculture ken ti pannakabagi ti NEDA iti pageskuelaan itay nabiit ket kinitada ti Material Recovery Facility-da (MRF) ken ti Award-winning a garden-da, kasta pay iti Nursery, Herbary, Tree Park ken ti nadalus ken naberde nga aglawlaw ti pageskuelaanda.
Ti Pug-os ES ket pagwadan iti padana nga eskuela kas met la iti barangay a pakaisursurotanna a mapadpadayawan ditoy Munisipalidad ti Cabugao. # (Web In-Action)
No comments:
Post a Comment