Cabugao, Ilocos Sur – Pinaneknekan ni Mr. Dante Naval, Municipal Meat Inspector nga umad-adu ti transaksion iti Cabugao-Dayo maigapu iti nasamay a panagrikus ken pannakaiyusar ti puonan dagiti koridor ken cattle traders ti Cabugao Cattle Traders Association nga idauluan ni Mr. Marciano Raciles.
Kanaig daytoy, iti panagmiting ti Vegetable Growers iti Municipal Conference Hall idi Setiembre 14, 2012, dinakamat ni Mayor Edgardo “Ediboy” S. Cobangbang, Jr. nga ehemplona ti panagballigi ti Cabugao-Dayo a napabulodan ti puonan ket maigapu iti napintas a pannakaimanehar ti pinansial a kasasaad ti asosasion, agtultuloy ti panagballigina kas pagtuladan koma ti dadduma nga asosasion.
Iti pannakiuman ti Web In-Action idi Setiembre 15, 2012 (Sabado) nga aldaw ti Dayo, imbatad ti kaaduan a dumadayo a nadardaras a maaramid ti panaggiginnatang ta nabubun-as dagiti maidayo nga ayup a maisibar a para-parti, para-lako ken para-sukat. # (Web In-Action)
No comments:
Post a Comment