Cabugao, Ilocos Sur – Kalpasan ti dua nga aldaw a panagsanay ti 8 a recipients (5-Cabugao ken 3-Caoayan, Ilocos Sur) iti Hands-on Training on Resource Protection, Rehabilitation and Aquasilviculture iti Setiembre 19-20, 2012, napagnunumuan a maipatungpal ti proyekto ti Bureau of Fisheries and Aquatic Resources (BFAR) iti Barangay Dardarat, Cabugao, Ilocos Sur kalpasan ti naited a panagsanay.
Imbatad dagiti pannakabagi ti BFAR a mayusuat ti Fish Farming iti lokasion ti mangrove plantation iti aplaya ti barangay a pakataraknan ti Malaga ken Blue Crab kas mainayon a livelihood projects para kadagiti mangngalap.
Iti panagleppas ti adal kadagiti nagsanay, naited ti sertipiko a pakakitaan ti pannakaipasagepsep ti konsepto ken kaammuan a mangiwardas ken mangmanehar ti proyekto nga itden ti BFAR.
“Ulitek manen a pagyamanan ti BFAR, LGU ken kasta met ti Apo a Namarsua kadagitoy a pagsayaatanmi ditoy Barangay Dardarat ta naparaburankami ti maiduma a fish sanctuary and cove. Aywananmi, padakkelenmi ken iyallatiwmi ti sistema kadagiti padami a coastal barangay kas ipagpaganetget ni Mayor Ediboy tapno agsaknap daytoy a pagimbagan,” imbatad ni Kapitan Danny Garcia.
Nagatendar iti panagleppas ti training ni Mr. Belmor C. Bugaoan, Provincial Fishery Officer. Kaduana a nangpatalged ti panagleppas ti adal kadagiti nagsanay dagiti Trainors a naggapu iti BFAR-RFTC, Aparri, Cagayan nga isuda Ms. Emma L. Ballad ken Ms. Sharon I. Celino kasta met iti BFAR-Region 1 nga isuda Mr. Dario Doctolero, Mr. Amando Galang ken Ms. Grace Santiago. Nagatendar met dagiti pannakabagi ti DA-LGU Cabugao: Ms. Milagros R. Paz, Licensed Fish Examiner, Mr. Robert S. Savella, AT ken Mrs. Marjorie Castillo, JO. # (Web In-Action)
No comments:
Post a Comment