Cabugao, Ilocos Sur – Naangay ti Technical Briefing dagiti mabenepisiaran ti naaprobaran a proyekto iti Farming System Research in Rainfed Lowland Area in Region 1, programa ti DA-RFU 1 a para kadagiti mannalon nga agtagikua/agsuksukay ti 5 ektaria (agdedenna) a rainfed area a mamulaan ti nateng, mais ken pagay. Naaramid ti Technical Briefing ita a Setiembre 7, 2012 iti pasdek ti Barangay Chapel, Barangay Bungro, Cabugao, Ilocos Sur .
Sakbayna, napili ti Barangay Bungro ken Brgy. Pug-os a pakaiwayatan daytoy a proyekto ti DA-RFU 1 babaen ti pannakikammayet ti LGU iti panangidaulo ni Mayor Edgardo “Ediboy” S. Cobangbang, Jr. nga ipatungpal ken tarabayen ti DA-LGU Cabugao nga imatonan ni Municipal Agriculturist Zenaida S. Andrada.
Imbatad ni Mr. Eddie Sevilleja, Presidente ti Bungro FA a manamnama a maruk-atan ti pakauna ti pundo itoy a bulan ti Setiembre 2012 a panangrugi ti proyekto a pakabenepisiaran dagitoy dua nga FA’s manipud iti DA-RFU 1.
Pakabuklan ti tinawen a pundo a maited kadagiti FA’s iti cash portion, livestock ken farm machineries mangrugi ti 2012 agingga iti 2014.
Innayon ni Presidente Sevilleja a mapasagepsepan dagiti kameng a mabenepisiaran iti alagaden ti asosasion a mangipakat kadagiti annuroten ti panagbulod ken panagusaran iti ramit ti asosasion.
Sinupusopan met ni Mr. Obas Bill Y. Baclig, AT-DA LGU babaen ti panangulitna ti pakabuklan ken pagalagadan ti programa ti DA-RFU 1 nangruna kadagiti kabarbaro a nagatendar.
Nagsarita met ni Mr. Edwin Joseph Franco, pannakabagi ti DA-RFU 1 iti maipapan ti pannakairugi ti proyekto.
Ti Memorandum Of Agreement (MOA) iti nasao a proyekto ket napirmaan babaen iti dadaulo ti FA’s, LGU-Cabugao, OPAG, DA-LGU ken DA-RFU 1. # (Web In-Action)
No comments:
Post a Comment