ADU TI NATULONGAN TI COMMUNITY SERVICES (CS) DITOY CABUGAO

Cabugao, Ilocos Sur – Naiwayat ti Medical-Dental  and other services ti Ilocos Sur  Hotline-Community Services ni Governor Luis “Chavit” Singson iti Munisipalidad ti Cabugao (33 Barangays)  ita a Setiembre 8, 2012 iti Cabugao Cultural and Sports Complex, Brgy. Rizal, Cabugao, Ilocos Sur.

Sakbayna, imbatad ni Mayor Edgardo “Ediboy” S. Cobangbang, Jr. a kaduana ni ABC President, Brgy. Captain Teddy U. Soller a nangbilin  kadagiti Barangay Captains a pakaammuanda  dagiti kalugaranda   iti pannakaangay manen ti panagagas nga isagut ni Governor Chavit ditoy ili a Cabugao.

Iti  interbiu ti DWRS ken ni Mayor Ediboy, impeksana ti panagyamanna ken ni Gov. Chavit kadaytoy nga all year-round a panagtulong ti Ama ti Probinsia kadagiti kailianna ditoy Cabugao. Innayon ti Alkalde Municipal  a pakakitaan daytoy ti agtultuloy a  pammateg ti Ama ti Probinsia ta malaksid kadagitoy ket adu pay a tulong ken progreso ti naipaaynan ken maisaruno nga itdenna manen a pagimbagan dagiti umili   ditoy ili a Cabugao.

Saan nga agressat ti tao a dumteng, dupudop ti nakipila kadagiti lamisaan a naisangrat a  para iti pagkasapulanda.  Sistematiko ti pannakaurnos ti panagpakonsulta ken panagitedan ti agas a nangpaannayas iti aktibidad. Naregget met dagiti Personnel ken pangulo ti opisina ti LGU-Cabugao a tumulong kadagiti sangaili a mangngagas ken katulonganda nga agasikaso ti pasiente.

Buklen ti ubbing, agkabannuag ken Senior Citizens dagiti nagpaagas. Nagyamanda ken naragsakanda a nagawid ta naikkanda manen ti libre a serbisio a nakatulong kadakuada.

Kalpasan a nataming ti kaudian a dimteng  nga agpaagas, nagturong dagiti nagserbisio iti panagagas iti pasdek ti Munisipio ket sinangoda ti insagut a pangaldaw ti LGU nga idauluan ni Mayor Ediboy. 

Nakipaset   dagiti mangngagas ken katulonganda  kas    iti Sinait District Hospital iti panangidaulo ni Dr. Armando S. Agdeppa, Dr. Val Savella, DMD, iti Ilocos Hotline, SB Member Dr. Carlito S. Pano ken SB Member Vicky S. Serna, Dr. Rudy M. Singson ti RHU-Cabugao, Dr. De Gracia ti Bantay. Ilocos Sur, Dr. De los Reyes, DMD  ken Dr. Magno Sol, DMD,  ti Provincial Health Office,  Nurses ken Midwives ti RHU-Cabugao kasta meten  dagiti BNS ken Barangay Health Workers a tinarabay dagiti Opisiales ti Barangay-da.  # (Web In-Action)