Cabugao, Ilocos Sur – Maangay ti 3-day Hands-on Training on Resource Protection, Rehabilitation and Aquasilviculture kadagiti walo a recipients a mangrugi iti Setiembre 19, 2012 agingga iti Setiembre 21, 2012 iti Barangay Dardarat, Cabugao, Ilocos Sur.
Ti panggep ti training ket ti panangsanay kadagiti project-beneficiaries iti concept of resource protection, rehabilitation ken aquasilviculture tapno maipromot ti Philippine National Aquasilviculture Program. Walo a recipients ti kangrunaan a masursuruan: 5 ti Cabugao idinto ta 3 ti Caoayan, Ilocos Sur.
Iti ababa a programa, linuktan ni Brgy. Captain Danny Garcia ti umuna nga aldaw ti paseminar ket nagyaman iti agtultuloy a panangtarabay ni Mayor Edgardo “Ediboy” S. Cobangbang, Jr. a kaduana ni SB Member Benedicto M. Savellano a makikammayet kadagiti ahensia kas iti BFAR tapno maisagut dagiti lumugar iti Barangay Dardarat iti maited a proyekto.
Iti anag ti mensahe ni Mayor Ediboy, kinaritna dagiti recipient a pintasenda, aywananda, padakkelenda ken paneknekanda a maipatungpal ti proyekto ken iyallatiwda ti maadalda iti kabarangayanda tapno agsaknap ti masagrap a pagimbagan nga iburayna.
Innayon ti Alkalde Municipal nga inton agsubli dagiti taga-BFAR ket mapagbalinton dagiti recipients ti proyektoda ket mainayon manen a trademark ti barangay a nakagun-oden iti nagkaadu a gapuanan ken pammadayaw.
Inted ni Mr. Dario J. Doctolero, Regional Training Coordinator ti Overview of the Training.
Umadu a makalapan ken agtultuloy a pannakaprotehir ti kabaybayan ti anag ti panagsarita ni Mr. Rogelio Ragonjan, pannakabagi ni Provincial Agriculturist Teofilo R. Quintal a saan a nakadar-ay. Malaksid kadagiti walo a recipients, nakipartisipar met iti nasao a seminar dagiti pannakabagi ti DA-LGU Cabugao nga idauluan ni OIC Mr. Nereo S. Daproza, ken Opisiales ti Brgy. Dardarat. # (Web In-Action)
No comments:
Post a Comment