COASTAL CLEAN-UP, NAGGIGIDDAN TI 7 A BARANGAY

Cabugao, Ilocos Sur – Naaramid ti panagdalus iti igid ti baybay  ti pito a Coastal Barangay ti ili a Cabugao iti Setiembre 17, 2012 kas iti Brgy. Dardarat, Salomague, Sabang, Namruangan, Daclapan, Salapasap ken Pug-os.

Imbatad ni MENRO Edgar S. Balangatan, AT/DA-LGU  a nasapa a napan nagdalus dagiti lumugar nga indauluan dagiti Opisiales ti Barangay-da  ken Farmers/Fisheries Associations. 

Kadua ni MENRO Balangatan ni Ms. Rowena Gay A. Abella, Coastal Resources Management Coordinator iti ENRMO, Vigan City a nagmonitor kadagiti nadakamat a barangay.

Iti Barangay Dardarat, grass cutter ti kangrunaan a nausar kadagiti nagtubo a ruot iti arubayan ti  Dardarat Fish Sanctuary and Cove agsipud ta adda pinusgan ni Brgy. Captain Danny Garcia a dua a bumarangay nga agdaldalus/mangmanmantener  iti inaldaw iti aglawlaw iti aplaya ken dagiti pasilidades ti barangay.

Kaaduan met ti nagdalus iti Barangay Pug-os nga indauluan da Brgy. Captain Arnold Yangat ken Federated Farmers President Elmer Bromeo. Umabot ti 54 ti nakipartisipar a bumarangay iti panagdalus.

Daytoy nga aktibidad ket regular a pagbinbinnuligan ti Environment and Natural  Resources Management Office, Provincial Office ken ti  Gobierno Lokal a makasakup kadagiti barangay a masarakan   iti igid ti baybay.

Paset  ti napateg a  programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a pannakamantener  iti nadalus a kabaybayan babaen ti agtultuloy a  panagdalus  dagiti bumarangay ken asosasion iti masakupanda tapno matagiben dagiti rekursos naturales ditoy a barangay. # (Web In-Action)