Cabugao, Ilocos Sur – Maiwaywayat ti Validation kadagiti naideliber ken naimula a seedlings babaen kadagiti pannakabagi ti Tanim Kalikasan, Inc. iti Munisipalidad ti Cabugao para iti Tawen 2012 partikular iti bulan ti Hunio agingga iti Setiembre 2012.
Imbatad ni MENRO-Desigante Edgar S. Balangatan nga adda 69,700 a bilang ti naideliber ti Tanim Kalikasan, Inc. kadagiti nangipalnaad ti panagkasapulanda ti maimulada kadagiti bakante a loteda. Kas gagangay, immuna a na-briefing dagiti immawat ti seedlings ken katulongan ti LGU ken NGO dagiti Opisiales ti barangay a nangmonitor kadagitoy a naimula.
Kabayatanna, umabot met ti 4,430 a seedlings ti naideposito iti Municipal and Plant Nursery a katinnulong dagiti NGO’s nga agited ti seedlings para iti National Greening a programa ti Gobierno-Nasional agpababa kadagiti LGU’s partikular iti barangay.
Innayon ni Balangatan a kalpasan ti Evaluation, ited ti NGO ti pagganagan ken insentibo a P.50 ti tunggal kapuon a naasikaso ti pannakapatan-ayna. Iti 2011, umabot ti 80,000 ti naimula a seedlings ket nagbiag met ti 88% daytoy a bilang. Manamnama a maiparuar ti datos ti nagbiag a seedlings a naimula iti biang ti NGO iti Tawen 2012 iti saan a mabayag.
Ti pannakaidur-as ti Re-Greening Program ket napinget a programa ti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno masulnitan dagiti nakalbo a kabakiran ken makatulong ti Gobierno iti pannakatagiben ti aglawlaw. # (Web In-Action)
No comments:
Post a Comment