Cabugao, Ilocos Sur – Umad-adu ti bilang ti umili nga agpaagas iti Rural Health Unit Cabugao. Iti pannakiuman ti Web In-Action, imbatad dagiti mangimaton ti Public Assistance Information and Complaint Desk ken Admission nga umabot pay ti 120 a pasiente ti agpakonsulta/agpaagas iti maysa nga aldaw nangruna iti aldaw ti Lunes. Agsipud ta adu ti agpaagas, pasaray saanen a masurot ti eskediul ti aldaw a naituding ket mataming latta ti maisar-ong nga umili nga agparikna iti an-annayenna. Kaaduan ti ubbing, agtutubo ken nataengan dagiti umay agpatulong. Naregget met dagiti Nurses ti RN-Heals nga idauluan ni Mrs. Janet Sison, RN kasta met dagiti Midwives ken ti Doktor.
Maaksionan daras ken masagsagana nga agas a maited ti kangrunaan a mangpaadu ti agpaagas, segun ti kaaduan a pasiente a nagdamagan ti Web In-Action iti tunggal aldaw.
Ti maiparikna a serbisio ti RHU Cabugao kadagiti umili ket resulta ti mai-prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno agtultuloy a mapalag-anan ken gumin-awa ti kasasaad dagiti addaan ti sagubanit nga umili. # (Web In-Action)
No comments:
Post a Comment