PEDERASION TI 4-H CLUB, NABUANGAY

Cabugao, Ilocos Sur – Naorganisar ti Cabugao Federation of 4-H Club iti  Setiembre 12, 2012 iti Municipal Conference Hall, Cabugao, Ilocos Sur babaen ti panangimaton ni Municipal 4-H Club Coordinator Joenah G. Sevilleja.

Nagatendar dagiti  Opisiales ti 4-H Club iti nadumaduma a barangay. Sakbay a natratar dagiti napapateg nga agenda iti panagtitipon, naiwayat ti eleksion ti Pederasion ket dagiti sumaganad ti nabutosan:

Allen Ubaldo, Presidente; Marjon Baclig, Vice President; Reyna Sevilleja, Secretary; Carol Serdenia, Assistant Secretary; Jay-r Gaspar, Treasurer; Elizalde Sajor, Auditor; Antonio Rabor, PIO; Project Leaders- Allen Christian Yangat, Jofel Castro, Raymark Solmerin, Bryan Sejalvo, Franceliza Morales ken Arnel Aquino.

Anag ti mensahe ni Mayor Edgardo “Ediboy” S. Cobangbang, Jr. ti panangbigbigna daytoy a panagtitimpuyog   dagiti agtutubo. Innayon ti Alkalde a padakkelen  koma dagiti agtutubo ti asosasionda ken itultuloyda ti agaramid ti nasayaat   babaen iti inisiatibada ket saan met nga agsardeng ti Gobierno Munisipal a tumulong kadakuada.

Left-Right Standing - (Zenaida Andrada, MA; Joenah Sevilleja, 4H Club Coordinator; Dante Gagto, Prov't 4H Coordinator; Mayor Ediboy; Reyna Micah Sevilleja, 4H Club Sec.; Ruel Gambua, Prov't. Federated 4H Pres.; Carol Serdenia, Cabugao 4H asst. Sec.; Franceliza Morales, Project Leader) Left-Right Front - (Reymark Solmerin, Project Leader; Bryan Sejalvo, Project Leader, Antonio Rabor, PIO; Jay R Gaspar, Treasurer; Arnel Aquino, Project Leader; Jofel Castro, Auditor)

Nagatendar met ditoy a meeting ni Mr. Dante U. Gagto, Provincial 4-H Club Coordinator, Provincial Agriculture Office, Ilocos Sur ken ni Mr. Rowell Gamboa, 4-H Club Federated President ti Ilocos Sur ket insingayda  dagiti pamanunotan ken  prinsipio ti naballigi nga organisasion.

Nabukel  pay iti  nasao a miting dagiti aktibidades a maigannuat iti pannakaisayangkat ti Provincial 4-H Camp a maangay idiay Brgy. Pug-os, Cabugao, Ilocos Sur inton Oktubre 28-30, 2012.

Ingunamgunam Mrs. Sevilleja ti pannakitinnulong dagiti 3 a kabbuangay nga asosasion ti 4-H Club ti    pannakaitrabaho  ti rehistroda  iti DOLE tapno naan-anay a masagrapda dagiti proyekto ken tulong nga ipaay   ti LGU Cabugao  ken dadduma pay nga Ahensia a makatulong kadakuada. 

Innayon ti 4-H Club Coordinator  nga adda 13 a 4-H Club a naisubmiteren  ti papelesda iti DOLE.

Inyebkas ni SB Member Benedict M. Savellano  ti P300,000 nga alokasion para iti 4-H Club kasta pay dagiti proyekto nga itden ti DA.

Nakiragup ken timmulong   iti nasao a miting dagiti Personnel ti DA-LGU nga idauluan ni Municipal Agriculturist Zenaida S. Andrada. # (Web In-Action)