Cabugao, Ilocos Sur – Nagatendar dagiti lider-mannalon ti 33 a barangay ti ili a Cabugao iti naisayangkat a Briefing on the Program Profile and Projects ken Plano ti Departamento ti Agrikultura (DA) nga inesponsoran ti Opisina ni Diputado Ryan Luis V. Singson, First Legislative District, Ilocos Sur ken ti DA-RFU 1 nga idauluan ni DA Regional Executive Director Valentino C. Perdido, Ph. D., Region 1 a naangay iti Baluarte Function Hall, Baluarte, Vigan City idi Setiembre 18, 2012.
Binayabay ni Mayor Edgardo “Ediboy” S. Cobangbang, Jr. dagiti lideres-mannalon ti Cabugao a nangatendar kadaytoy napateg a taripnong a nakaibinsaan dagiti pagimbagan a maipaay kadagiti mannalon ti Ilocos Sur.
Iti naaramid a programa, naiyam-ammo dagiti bisita nga Opisiales a naggapu iti Opisina ti DA-RFU 1, Municipal and City Mayors ti Ilocos Sur, Municipal Agriculture Officers ken dagiti Farmers Organizations.
Pammasangbay a panagsarita ti impaay ni Congressman Ryan Luis V. Singson, First District, Ilocos Sur ket dinakamatna ti pateg ti sektor-agrikultura a maikkan ti importansia a mangitag-ay ti panagbiag ti sangaprobinsiaan.
Nagtinnulong dagiti Opisiales ti DA-RFU 1, pannakabagi ti nadumaduma nga LGU’s ken NGO’s a nangibaskag kadagiti plano ken proyekto a pagsayaatan ti sektor-agrikultura iti masakupanda.
Iti Program Briefing, ti kinasupisiente a gubuayen dagiti programa, proyekto ken plano ti nagkakammayet a sektor dagiti natratar babaen iti panangiwardas ni DA Regional Executive Director Valentino C. Perdido, Ph. D. ket nadakamat a napagsasaritaan ti maipapan iti irigasion, dadduma nga impraestruktura kas iti farm-to-market roads, farm mechanization (makinaria) ken post-harvest facilities, extension, marketing, credit, demand management ken policy environment tapno agbalin a globally competitive dagiti mannalon ken dagiti produksion-da.
Natratar pay ti pannakaitandudo ti P-noy Rice and Corn Program a mangsolbar ti krisis ti taraon. Kasta met iti High Value Crops Development program kas iti nadumaduma ti klasena a nateng a mangnayon ti masapulan dagiti mannalon kasta pay iti panagtaraken ti ayup (livestock production).
Naaramid ti Open Forum ket naidasar dagiti napateg a pamanunotan ken dadduma pay a pakaseknan mainaig iti agrikultura ken produksion. Nataming dagitoy a sibaballigi babaen iti napintas a panagkikinnaawatan dagiti nagatendar. # (Cabugao Federated Farmers Association)
No comments:
Post a Comment