REGISTRATION TI 4 P’S TI KADA BARANGAY, NAIYUSUAT

Cabugao, Ilocos Sur – Naaramid ti rehistrasion ti mabenepisiaran ti Pantawid Pamilyang Pilipino Program (4 P’s)  ti ili ti Cabugao iti Setiembre 18, 2012 a no sadino a ditoy ket nagtitiponan  dagiti recipients iti Brgy. Sisim, Catucdaan, Maradodon ken Aragan iti bigat ken sabali manen a nagkakadua a barangay iti malem iti   Cabugao Cultural and Sports Complex, Brgy. Rizal, Cabugao, Ilocos Sur.

Sakbay ti Registration, naaramid ti ababa a programa. Kimmablaaw ken nagyaman ni Mayor Edgardo “Ediboy” S. Cobangbang, Jr. iti Department of Social Welfare and Development (DSWD) iti pannakaaprobar ti 1,143 a mainayon a recipients ti 4 P’s ditoy Cabugao. Impaganetget ti Alkalde Munisipal kadagiti makaawat kadaytoy a benepisio nga aramidenda dagiti kabuyogna a pagrebbengan tapno naannayas ti pannakaipakat daytoy a programa.

Pinagyamanan pay ni Mayor Ediboy dagiti Opisina ti LGU kas iti RHU ken  MSWDO kasta met iti  DepEd  ken  kasta pay  ti Sangguniang Bayan nga idauluan ni Vice Mayor Danny Q. Gazmen nga agtitinnulong a mangyimplimentar  kadaytoy a programa.

Impeksa met ni Vice Mayor Danny Q. Gazmen ti panangsuportana kadaytoy a programa. Nupay kasta, imbatadna nga saan la koma nga agpatingga ditoy  ti makaawat kadaytoy ngem tulonganda pay ti bagbagida.

Imbinsabinsa met ni SB Member Dr. Carlito S. Pano, M.D. iti kaadda ti 4 P’s ken  pannakaipaay  iti umuna a 500 a recipients ti Cabugao. Ingunamgunamna kadagiti mainayon a benepisiario nga aramidenda met dagiti kabulbulonna a pagrebbenganda.

“Pagyamananmi unay daytoy ken ni Mayor Ediboy ken kaduana nga Opisiales ti Munisipio. Maragsakankami  a maaddaan ti kastoy a tulong,” imbatad ni Ms. Emerita Cabaluna ti Brgy. Aragan, Cabugao, Ilocos Sur.

Nakikaysa met iti nasao a taripnong da SB Member Vicky S. Serna, SB Member Jemaima Tan-Yee, SB Member Benedict M. Savellano,  Brgy. Captain Geogie Benavidez, Brgy. Captain Dominador Seguritan, Brgy. Captain Ruben Siruno, Brgy. Captain Modesto Ronque, Brgy. Captain Melanio Santella, Brgy. Captain Fermin Sarinas,  RN-Heal Nurses, RHU Personnel ken MSWDO Personnel nga idauluan ni Mrs. Lydia S. Gazmen, Municipal Social Welfare and Development Officer.

Imbatad ni Ms. Annabelle Rosario, DSWD-Municipal Link nga agpatingga ti Registration agingga no Biyernes a mangsapasap ti 33 a barangay ti ili a Cabugao.  #(Web In-Action)