Cabugao, Ilocos Sur – Maysa a kapatgan nga asikasuen dagiti dadaulo ti pageskuelaan ket ti natalged a linong dagiti pasdek-pagadalan iti las-ud ti panagbabasa ti Tawen 2011-2012.
Iti pannakiuman ti Web In-Action kadagiti Principal, Head Teachers, TIC ken ti Public Schools Supervisor ti DepEd Cabugao District, pagyamyamananda ti dakkel iti naipaay a galba ken kanaigna a materiales manipud iti Gobierno Munisipal nga idauluan ni Mayor Edgardo “Ediboy” S. Cobangbang, Jr. nangrugi ti panagbabasa ti Tawen 2011 agingga ita a 2012. 
Innayonda a pagyamanan pay ti Chairman ti Committee on Education ti Sangguniang Bayan a kaduada a nagkalikagum kadagitoy a materiales a pinagtarimaanda ti eskuela ken baro a naipasdek a pagadalan iti las-ud ti DepEd Cabugao District.
Dagiti barangay a pakasarakan ti pageskuelaan a nakasagrap ti naipaay a tulong a galba, vulca seal ken lansa ket dagiti sumaganad:
Public Elementary School: Alina-ay/Sisim, Aragan, Arnap, Bungro, Cael-layan, Catucdaan, Cuantacla, Daclapan, Dardarat, Lipit, Maradodon, Nagsincaoan, Namruangan, North Central, Pila, Pug-os, Reppa-ac, Sabang, Sagayaden, Salapasap, Salomague, South Central ken Turod; Primary School- Caset, Carusipan, Nagsantaan; Public High Schools- Cabugao National High School, Sisim National High School, Pug-os National High School ken Lipit National High School.
Ti Gobierno Munisipal ket agtultuloy a tumultulong kadagiti kalikagum dagiti mangisursuro ken nagannak a pagsayaatan dagiti pageskuelaan tapno natalged ti pagbasaan dagiti ubbing a panuli iti masakbayan ti ili a Cabugao. # (Web In-Action)
No comments:
Post a Comment