BARANGAY A NAAPEKTARAN TI TUDO, TULONGAN TI LGU

Cabugao, Ilocos Sur – Dagiti  Barangay  ti  Maradodon, Cael-layan,  Catucdaan ken Sisim  ket  naireport iti Munisipio  a kangrunaan a  naapektaran  iti kallabes a nagsasaruno nga aldaw a napigsa ti tudo gapu iti agsubli-subli a bagyo ken Habagat.   Idi Setiembre 1, 2012, impadamag ni Brgy. Captain Dominador Seguritan  a dimmanon a nagbisita ni Mayor Edgardo “Ediboy” S. Cobangbang, Jr. idiay Barangay Catucdaan  tapno kitaenna ti pakaseknan dagiti lumugar,  nadadael a pasilidad ken impraestruktura ken makapatangna dagiti opisiales ken lumugar  ti kadarapat a  barangay a maseknan tapno maaksionan a daras dagitoy.

Iti Barangay Maradodon, naipadamag a kasapulan ti serbisio ti buldoser tapno maipulang ti na-wash out a rechanneling project  ken maisimpa  ti dadduma a paset ti dalan a kinurukor ti naglippias  a danum ti karayan  iti kapigsa ti tudo ti Habagat.

Iti Barangay Catucdaan, insingasing  ni Brgy. Captain Dominador Seguritan a maaramid koma a box culvert ti kanayon a makurukor a drainage crossing  iti dalan a mapan iti eskuela ken kasta met a kasapulan ti buldoser ken loader a mangipulang iti atiddog a  nayanud a naitambak iti  rechanneling site ti karayan a mabatogan ti barangay-da.

Iti met Brgy. Sisim, nareggaay  ti paset ti  pingir ti turod nga asideg ti kongkreto a kalsada iti Sitio Tara-tara. Ginubuay daytoy ti panagrasi ti daga  iti napigsa ken napaut a tudo. Temporario a nagaburan ti reggaay babaen ti naiwayat a ragup-obra ti tallo a nadakamat a barangay ken timmulong ti makinaria ti Munisipio.

Imbatad ni Municipal Engineer  Crescencio C. Formoso iti pannakiuman ti Web In-Action a tarimaanenda  dagitoy a disso ti nadadael babaen  iti mayeskediul a panangobra ti  makinaria ti Munisipio ken mayaramidan ti Program of Works (POW) dagiti matarimaan nga istraktura wenno pasilidad a kasapulan ti dakdakkel a  mausar iti  pannakasimpada.

Innayon ti Inhiniero  nga adda pay sumagmamano a disso ti ayan ti nakurukor ken nayanud  kas iti dalan iti Sitio Padayog, Brgy. Cael-layan ken Sitio Madula, Barangay Turod-Patac.

Ti panangaksion  ti Munisipio a  mangsigud a mangsimpa kadagiti nadadael nga impraestruktura ken pasilidad  gapu iti kalamidad a dimteng ket maysa a kangrunaan  nga addangna  tapno agtultuloy ti pannakausar dagitoy  a saan a maapektaran ti panagbiag dagiti maseknan nga umili nangruna iti nasulinek a barangay. # (Web In-Action)