Cabugao, Ilocos Sur – Naangay ti District Escoda Celebration ti Girl Scout of the Philippines (GSP) Cabugao District iti Cabugao Cultural and Sports Complex, Brgy. Rizal, Cabugao, Ilocos Sur a no sadino a ditoy ket nagpartisipar dagiti Twinklers, Star Scout ken Girl Scout ti nadumaduma a pageskuelaan-elementaria agraman ti Girl Scout ti dua a sekundaria: Cabugao National High School ken Cabugao Institute.
Immuna a naaramid ti Holy Mass iti Cabugao Catholic Church sa naaramid ti Girl Scout Ceremony iti Complex. Indauluan ti Salomague Girl Scout ti kararag, Colors iti Cabugao National High School Senior Scouts, Panunumpa sa Katapatan ng Watawat ti Arnap Girl Scout, Re-dedication to the GS Promise and Law ti CSCS Girl Scout, Star Scout Promise ti Namruangan Star Scout, Star Scout Law ti Salapasap Star Scout ken Twinkler Promise and Law ti Reppa-ac Twinkler.
Iti panagmensahe ni Mrs. Helen V. Siruno, District Commissioner, dinakamatna ti pateg ti Tema: “Stop the Violence, Speak Girls’ Rights”. Kimmablaaw ken pinagyamananna ti anep dagiti GSP Leaders, scout ken nagannak itoy a selebrasion ti Distrito ken kangrunaan ti patinayon a pannakitaripnong ti Ama ti Ili a ni Mayor Ediboy ken SB Member Vicky S. Serna kadagiti aktibidades ti DepEd District.
Naisaruno dagiti Cheers and Yells by School babaen ti panangiwardas ni Mrs. Digna Talusig, District Field Adviser. Naisaruno ti ESCODA CEREMONY babaen ti panagidatonda ti sabong iti sakaanan ti ladawan ni Josefa Llanes Escoda babaen ti panangimaton da Mrs. Melvi Sajonia ken Mrs. Estrellita Siruno, GS Trainers, In-Charge.
Nagmensahe ni Mayor Edgardo “Ediboy” S. Cobangbang, Jr. Intan-okna ti akem ti babbai a katulongan a mangitag-ay ti disiplina ken timpuyog iti kagimongan. Dinakamatna a modelo iti kabibiag ni Josefa Llanes Escoda a pagtuladan dagiti sektor-kababaihan ti Cabugao. Binigbigna ti di magatadan a regta dagiti ubbing, estudiante, mangisursuro ken nagannak a nangipakita ti tunosda ken tibkerda a mangipaduyakyak ti kaipapanan ti Tema ti selebrasion.
Nagsarita met ni SB Member Vicky S. Serna, GS District Committee Chairman. Agtultuloy a pannakaprotektar ti kalintegan dagiti babbai kas ipasimudaag ti kakastoy nga aktibidad ti anag ti panagsaritana. Pinadayawanna ti naurnos ken agtultuloy ken naballigi a panagselebrarda a babbai iti kanaigna pay nga aktibidad.
Inyam-ammo ni Mrs. Melvi S. Sajonia, GSP Trainer/CSCS Commissioner ti Guest of Honor and Speaker. Linagip ni Miss Glenda Tabula, CPA, dati a Girl Scout, Guest of Honor and Speaker ti pagwadan a padasna a kas Girl Scout idi agad-adal. Kalikagumna met a maitandudo ti karbenganda a babbai para iti pagsayaatan ti kagimongan.
Naaramid ti Girl Scout Presentations ket immuna ti UCCP Twinklers, sa naisaruno ti Zone 4 (Catucdaan ES Girl Scouts), Zone 3 (Pila ES Girl Scouts), Zone 2 (Sabang ES Girl Scouts), Zone 1 (Bungro ES Girl Scouts), Cabugao NHS Senior Scouts, ken Cabugao Institute Senior Scouts.
Sinerraan ni Mrs. Evangeline Seatriz, President, Cabugao GSP Troop Leaders Association ti programa. Nagyaman iti amin a nakipartisipar iti panagballigi ti aktibidad. Nagpaay nga Emcee da Ms. Jennifer D. Savellano, Ms. Anabelle Ancheta ken Ms. Rocilyn Sabaten. # (Web In-Action)
No comments:
Post a Comment