Cabugao, Ilocos Sur – Nagtataripnong dagiti Opisiales a mangpili iti agbalin a Public Servant for a Day (agakem a Mayor ken dadduma pay nga Opisiales) iti inaldaw mangrugi inton Oktubre 8, 2012 manipud iti naisubmiter a listaan dagiti ubbing manipud iti nadumaduma a pageskuelaan (high school ken elementaria) iti ili ti Cabugao.
Daytoy a programa ket maisayangkat tapno masursuruan dagiti ubbing a mangsango ti responsibilidadda ken matubayda iti disiplina ti kinaliderato.
Buklen dagiti agpili nga Opisiales da SB Member Vicky S. Serna, SB Member Dr. Carlito S. Pano, SB Member Dr. Jemaima S. Tan-Yee, SB Member Benedicto M. Savellano, ken Mr. Dario Roy Siruno, Program Coordinator manipud iti listaan ti estudiante ken pupils a naisubmiter iti nadumaduma a pagadalan ti ili a Cabugao.
Kanaig daytoy, impalagip ni Mayor Edgardo “Ediboy” S. Cobangbang, Jr. kadagiti dadaulo ti Opisina ti LGU-Cabugao kalpasan ti Flag Ceremony ti Pamilia-LGU iti Setiembre 24, 2012 iti maangay a mitingda tapno mapagsasaritaanda ti obraen dagiti ag-duty nga ubbing ken estudiante.
Iti pannakiuman ti Web In-Action, imbatad ni SB Member Benedicto M. Savellano a mangrugi nga agakem ti mapili nga ubing ken estudiante a Public Servant inton Oktubre 8, 2012.
Iti met laeng dayta a gundaway, pinagyamanan ni Mayor Ediboy dagiti amin a kameng ti Pamilia-LGU a nangaramid ti akemda kadagiti napalabas nga aldaw a pannakaiwayat ti Evaluation iti Munisipio babaen iti DILG Regional Office iti pakaseknan ti Seal of Good Housekeeping ken Anti-Red Tape. # (Web In-Action)
No comments:
Post a Comment