GACO IRRIGATION PROJECT, MARUGIAN

Cabugao,Ilocos Sur – Naangay ti Pre-Construction Conference ti Gaco Irrigation Project ti National Irrigation Administration (NIA) iti Barangay Cacadiran, Cabugao, Ilocos Sur iti Setiembre 20, 2012.

Naaramid ti Komperensia iti Barangay Hall ti barangay a naisaad iti Sitio Rebba a nagatendaran dagiti opisiales ken kameng ti Magarang Farmers Irrigator’s Associtaion, Inc. nga idauluan ni Mr. Elpidio Sonido kasta met dagiti opisiales ti LGU Cabugao nga idauluan ni Mayor Edgardo “Ediboy” S. Cobangbang, Jr.

Kimmablaaw ken nagyaman ni Brgy. Captain Alex Siruno ta natungpal met laengen ti pannakapasayaat  ti irigasion ti  Gaco ket manamnama ti supisiente a suplay ti padanum iti irigasion a makasakup kadakuada.

Imbinsa ni Engr. Dominador G. Mangaoang, Chief Engineering and Operation Section ti proyekto iti pakasaritaan ti NIA, ti kasasaad ti pasilidades ti Gaco a pakaiwayatan ti proyekto ken ti pagrebbengan dagiti water-users apaman a mausarda ti danum iti maaramid a proyekto a masasao nga Irrigation Management Trasfer (IMT) ken sharing-scheme ti pagbayad ti padanum.

Innayon pay ni Engr. Mangaoang nga umabot ti 1,200 ektarias ti manamnama a  mapadanuman ti irigasion iti 13 a barangays ti ili a Cabugao  ngem umuna pay a tamingenda iti First Phase ti 100 ektarias a Restoration Area ita a 2012. Manamnama a mapunduan ti 250 Million mangrugi ti 2012 agingga iti 2016 a pannakaileppas a naan-anay daytoy a proyekto.

Naisaganad ti panangilawlawag ni Engr. Emilio Bondad, Project In-Charge ti pannakaaramid ti Intake, istraktura ken pasilidades ti maaramid nga irigasion. Innayon ti Inheniero a makongkreto  ti main canal ken laterals tapno malapdan ti conveyance losses ti danum kas iti seepage (panagsagepsep ti daga).

Naisaruno a nagsarita ni Engr. Adriano F. Amano, Division Manager A, ti Irrigation Management Office (IMO)  ti NIA-Sta Maria, Ilocos Sur. Kinablaawanna dagiti Opisiales-Lokal a nagatendar ken kadagiti mannalon a mabenepisiaran iti proyekto. Impaganetgetna a pakpakauna pay laeng dagiti maaramid ket adu pay ti maileppas a pasilidades iti masakbayan. Imbatadna nga adalenda ken  agaramidda pay ti “reservoir dam”  iti surong ti dati a pamastrekan ti Gaco tapno manamnama ti naan-anay a suplay a danum a maruk-atan uray ti katikagna. 

Kimmablaaw met  ken nagyaman ni Mayor Ediboy kadagiti Opisiales ti NIA, ni   Diputado Ryan  Luis V. Singson nga imbagian ti Chief of Staff-na  ken  kasta pay kadagiti  kaduana iti LGU Cabugao a nakitinnulong a nanggun-od  kadaytoy a proyekto ti irigasion ditoy Cabugao. 

Innayon ti Alkalde Municipal nga agtalek kadagiti kailianna a mangisakit, aywananda   daytoy a dakkel a proyekto a naited ditoy Cabugao. Babaen ti nasayaat a binnadang, aggin-awa dagiti mannalon ket lumag-an ti panagbiag ti kaaduan nga umili. Iti kasta, no pumigsa ti “purchasing power-da” ket pumigsa met ti ekonomia ti ili a maisubli kadakuada babaen iti porma ti nagkaadu a serbisio.

Nakikaysa met iti Komperensia da Vice Mayor Danny Q. Gazmen, ABC President, Brgy. Captain Teddy U. Soller, SB Member Benedicto M. Savellano, MPDC Florante Jara,  Sir Jimmy a Chief of Staff ni Diputado Ryan, Hon. DJ Savellano,   Kapitanes ti masakupan ti irigasion, Opisiales ken bumarangay ti Brgy. Cacadiran, Opisiales ken kameng ti Magarang FIA, Inc. ken taga-Media.

Iti Open Forum, nagtinnulong da Engr. Amano ken Engr. Mangaoang a nangsungbat kadagiti nagsaludsod a nakapnekanda met. Ingunamgunam ni Engr. Amano nga agtultuloy koma a  maaywanan  ti “watershed area” ti Gaco River tapno saan nga agkiddit ti danum a mangsuplay ti  maaramid nga irigasion. # (Web In-Action)