SEAL OF GOOD HOUSEKEEPING KEN CSC AWARDS, NAITED

Cabugao, Ilocos Sur – Naited ti Seal of Good Housekeeping ken ni Mayor Edgardo “Ediboy” S. Cobangbang, Jr., nagun-od ti LGU-Cabugao a pammadayaw iti Department of the Interior and Local Government (DILG)   iti ababa a seremonia a naangay iti sango ti Munisipio kalpasan ti Flag Ceremony ti Pamilia-LGU  iti Setiembre 10, 2012. Inyawat ni DILG OIC Provincial Director Victoria H. Ramos ti bronze seal ken ni Mayor Ediboy a binayabay da Vice Mayor Danny Q. Gazmen, SBM Dr. Carlito S. Pano ken SBM Benedict M. Savellano.

Immuna a  nangted  ni Director Ramos ti Briefing  no kasano a nagun-od ti LGU-Cabugao daytoy a napateg a pammadayaw.

Imbatad ni Municipal Local Government Operations Officer V Ms. Connie L. Quinola iti pannakiuman ti Web In-Action a nagun-od daytoy a pammadayaw iti benneg ti “Transparency and Accountability” ti liderato ti LGU Cabugao iti Tawen 2011.

Naisaruno a nagsarita ni Mr. Hedy Jose B. Lardizabal, Director II-CSC, ISFO ket imbasana ti Mensahe  da  Presidente Benigno C. Aquino III ken Dr. Francisco Duque III, Chairman, Civil Service Commission  a nangibuksil  ti kaipapanan ti panangselebrar ti 112th Philippine Civil Service Anniversary ita a bulan ti Setiembre 2012.

Naisaganad a naited ti Certificate of Recognition a nai-award kadagiti empleado  ken agserserbi iti  dadduma nga ahensia a naisalinong iti LGU-Cabugao  manipud iti lima a tawen nga agpangato a nagserbisio iti Gobierno. Nagbinnuligan da Mayor Ediboy ken Director Lardizabal a nangiyawat dagitoy a pammadayaw kadagiti recipients.

Iti mensahe ni Mayor Ediboy, imbatadna a “kolektibo”  a gapuanan ti nakaigapuan ti pannakapadayaw ti ili ti Cabugao iti Seal of Good Housekeeping ket ingunamgunamna a maitultuloy latta ti pannakaited ti napintas a serbisio kadagiti umili babaen ti naimpapusuan a panangipaay  maibasar iti kabaelan ken  propesion.

Paset iti mensahe ni Director Lardizabal ti panangdakamatna iti naiwayat a surbey  nga iti panagserbi iti sabali ti kangrunaan. Maysa a napateg a bininsana ti kinamanagserbi koma ti amin a public servants  iti sabali  (altruism) wenno panangipaay iti kabaelan  iti pagsayaatan iti kaaduan. Innayonna: “Altruism is an act of heroism” kas ipaganetget ti tema ti PCSC Anniversary. # (Web In-Action)