Cabugao, Ilocos Sur – Nareorganisar ti dati a Cabugao Vegetable Growers and Traders Association iti Setiembre 14, 2012 iti Municipal Conference Hall, Cabugao, Ilocos Sur a dinar-ayan dagiti agpatpatanor ti nadumaduma ti klasena a nateng kadagiti barangay ti ili a Cabugao.
Nakitaripnong ni Mayor Edgardo “Ediboy” S. Cobangbang, Jr, a kaduana ni Vice Mayor Danny Q. Gazmen iti nasao a re-organizational meeting. Kimmablaaw ken binigbig ti Alkalde Munisipal nga agbalin daytoy baro nga asosasion a Core Group ti agpatpatanor ti nateng a mangipatungpal iti programa ti Munisipio pakaseknan iti merkado ti nateng.
Ingunamgunam ti Alkalde kadagiti nagatendar nga aywananda ti asosasionda ket ipaneknekda a mapadakkelda. Dinakamat ni Mayor Ediboy a tuladenda ti naballigi a nagbalinan ti nabuangay a Cabugao- Dayo a naikkan ti puonan a napadakkelda ken kasta met ti pannakapapigsa dagiti asosasion a naikkan met iti pagpuonanda. Babaen ti nasayaat a panangmaneharda, naisublida iti Munisipio dagitoy a gatad a nabulodda. Ninayonan ti Munisipio ti nasublat manen dagitoy a 13 nga immuna nga asosasion ken maikkan met ti “soft loan” dagiti dadduma. Innayonna a batangda met ita ti tumulong ket awan ti rason a dida ipaay ti kaikarian dagitoy a pannakatarabay basta maipaneknekda a maaywanan ken mapadakkelda ti asosasion ken agserbi iti sapasap.
Pammasingked itoy, imbatad ni Mayor Ediboy ti pannakayalokar ti P500,000 kadagiti vegetable growers a pangrugianda a puonan ken maikkanda ti kabukbukodanda a pagyanan iti lote ti Munisipio a kadarapat ti Dayo-Cabugao, Brgy. Baclig, Cabugao, Ilocos Sur.
Impeksa pay ti Alkalde Munisipal iti panagtalekna iti liderato ti asosasion a mangted ti kaipapanan kadagiti programa ken proyekto nga ituyang ti Gobierno Munisipal kadaytoy a sektor ti Agrikultura.
Nakikaysada iti Alkalde Munisipal ken kadagiti nabukel a panggep ken plano ti asosasion da SB Member Benedicto M. Savellano, Chairman, Committee on Agriculture ti Sangguniang Bayan a nangipasingked a kaduana ni Vice Mayor Danny Q. Gazmen ti panangilungalongda iti Konseho Munisipal kadagiti addang nga agtultuloy a mangpasayaat pay ti kasasaad dagiti mannalon ti ili a Cabugao.
Dagiti napili nga Opisiales ti Baggak Cabugao Vegetable Producers Association ket isuda: President-Armando Azcueta; Vice President-Orencio Sadioa; Secretary-Wilson Discion; Assistant Secretary-Elmer Bromeo; Treasurer-Eddie Sevilleja; Assistant Treasurer-Virgilio Castro; Auditor-Rogelio Barlolong; Business Manager-James Sera; Assistant Business Managers- Peping Sabugo, Nestor Sumagit ken Marcos Tacuboy. # (Web In-Action)
No comments:
Post a Comment