Cabugao, Ilocos Sur – Naaramid ti pannakaibunong dagiti libre nga school bag nga impaay ti Community Services (CS) ni Gov. Luis “Chavit” Singson ti Probinsia ti Ilocos Sur kadagiti amin a pagadalan ti elementaria/primaria iti Munisipalidad ti Cabugao, Ilocos Sur idi Setiembre 4, 2012, nangrugi ti oras ti alas nuebe pasado ti bigat.
Nagkatlo a grupo dagiti nagiwaras a buklen dagiti pannakabagi ti Community Services (CS) a naggapu iti Baluarte, Vigan City ken LGU Cabugao. Dagiti maikkan ti libre nga school bag a nakaipanan ti ladawan ti ingungoten a Gobernador ket dagiti ubbing iti Day Care, Kindergarten, Grade 1 ken Grade 2 ti kada pageskuelaan.
Nabukel ti Set A ken B a barangay a pakasarakan dagiti pageskuelaan-elementaria/primaria a nagibunongan dagiti tallo a grupo ket dagiti sumaganad:
Set A- Maradodon, Catucdaan, Alinaay/Sisim, Aragan, Turod-Patac, Carusipan, Arnap, Lipit, Nagsincaoan/Cacadiran, Cuantacla, Sagayaden, Pila, Bonifacio ken Quezon.
Set B- Cael-layan, Nagsantaan, Reppaac/Bato, Pug-os, Salapasap, Bungro/Margaay, NISTC/Rizal, North Central, Baclig, Turod, Salomague, Dardarat, Sabang, Daclapan, Namruangan.
Nabara ti panangsarabo dagiti Head Teachers agraman dagiti mangisursuro kadagita a pagadalan kadagiti grupo ti nagibunong. Nadayaw dagiti ubbing a naikkan ti bag ket kaduada dagiti mannursuroda a nagyaman ken ni Gov. Chavit ken kadagiti nagiwaras kadagitoy a naitulong nga alikamen dagiti ubbing nga agbasa.
Nalpas ti panagiwaras iti alas dos pasado ti malem iti dayta nga aldaw. Kalpasanna, nagsubli dagiti grupo iti Munisipio para iti pannakiuman dagiti nangtarawidwid iti daytoy nga aktibidad manipud iti Gobierno Probinsial iti Ama ti Ili, Mayor Edgardo “Ediboy” S. Cobangbang, Jr. a naragsakan met ken nagyaman kadagitoy a naipaay manen a tulong manipud iti Ama ti Probinsia, Gov. Luis “Chavit” Singson kadagiti kailianna ken iti naballigi a pannakaisayangkat daytoy a gannuat. # (Web In-Action)
No comments:
Post a Comment