Thursday, May 14, 2015

BALANSE TI SUPLAY TI NATENG ITI MERKADO

Cabugao, Ilocos Sur – Maibatay iti  pammaliiw dagiti mangtartarabay kadagiti agmulmula ti nateng iti DA-LGU ket apagdillaw ti ibabassit ti suplay ti nateng iti merkado ti ili a Cabugao agsipud ta nagaget dagiti mannalon nga agmula no la ketdi adda ti pagsibogda no kastoy a katikagna ket kaykayatan pay dagiti agtan-ay a nateng ta mayat ti tiempo nangruna dagiti mabiit a maapit kas iti utong ken balatong. 

Apaman a naapitda ti immuna a naimulada ket isarunoda manen ti agmula iti namnamaenda a mayataday iti tiempo a klase ti nateng.

Kabayatanna, adu met ti nakaisapa iti panagmulada  iti maysa a klase ti nateng kas koma iti Hybrid a Kamatis ngem nadaras a 
nagatang iti Tiendaan ken iti babaen kadagiti  Vegetable Traders ket naliklikan pay iti kellaat a panagbaba ti presio ta nagbalanse ti masasao a “supply and demand” ket namantener ti presio a nakasubbotan  dagiti mannalon iti inusarda a kapital iti panagmulada.

Kabayatanna,  kaaduan kadagiti kameng ti Cabugao Vegetable Growers and Producers Associaton nga idauluan ni Mr. Armando Azcueta ti nagisapa met iti mulada ngem nagduduma ti klase ti nateng nga immulada tapno maliklikan iti “oversupply” iti Merkado a mangipababa ti presio.

Dagitoy nga inisiatiba ket resulta ti agtultuloy a panangtarabay ti Gobierno Munisipal kadagiti agmulmula ti nateng nangruna iti pannakatulong dagiti asosasion kadagiti barangay tapno adda latta a mainayon iti pagtaraon a kasapulan ti nasalun-at nga umili. # (Web Situational Report)

No comments:

Post a Comment