Friday, May 15, 2015

NAPINTAS A SERBISIO, MAIPRAYORIDAD TI MARKETGOERS

Cabugao, Ilocos Sur – Segun ken ni Mrs. Norma S. Bertumen, Market Supervisor ti Cabugao NISTC Public Market  a taginayonenda ti pannakaipaay ti napintas a serbisio kadagiti aggatang ken aglaklako iti nadumaduma a kasapulan ti pagbiag iti uneg ti Tiendaan ti Cabugao. 

Innayon ni Mrs. Bertumen nga adda regular a koordinasion kadakuada  ken panagmonitor ti Department of Trade and Industry (DTI)-Vigan City iti pakaseknan ti presio ken pagkiluan iti Tiendaan. Naipasdek ti “Timbangan ng Bayan” iti dua a disso, ti  kanatengan ken kakarnean/kaikanan tapno adda pangkitaan dagiti aggatgatang no umisu met laeng ti kilo iti nagatangda ngem agpatingga laeng iti 15 Kilograms ti pagkiluan a libre. 

Malaksid iti pannakamonitor ti presio, pagkiluan, pasilidades ti tiendaan ket maipampamaysa iti pannakamantener ti kinadalus  ti uneg ken aglikmut ti tiendaan nangruna kadagiti Comfort Rooms (CRs). 

Nupay kasta, agtultuloy  ti umay makitienda uray pay kadagiti agindeg iti kabangibang nga ili a mangpaadu ti malakuan dagiti adda iti puestona iti Tiendaan.

Dagitoy nga agtultuloy a panagsayaat ti Tiendaan  ket gubuay iti nasamay a Direktiba ni Mayor Edgardo “Ediboy” S. Cobangbang, Jr. nga ipatungpal  ti Management Staff  ti NISTC Public Market. 

Iti sabali a bangir, segun ken  ni Market Supervisor Norma S. Bertumen, nga ikkanda met ti importansia iti inspeksion kadagiti ambulant vendors babaen iti panagpasiar ken panangpalagip ti Public Sanitary Inspector ti LGU-Cabugao kadagiti Food Handlers nga aglaklako iti ikub ti Tiendaan.

Malaksid iti uneg ti Tiendaan, agtultuloy met ti koordinasion ti Opisina ti MENRO-LGU Cabugao ken ni Mrs. Bertumen iti agtultuloy a pannakadalus iti agsumbangir ti Kalsada Nasional a batog ti Tiendaan agraman kadagiti drainages tapno nasigo ti sanitasion ken nasalun-at nga aglawlaw ti NISTC Public Market a para met laeng iti sapasap. # (Web Situational Report)

No comments:

Post a Comment