Monday, May 4, 2015

MEDICAL MISSION, NAINDAKLAN A PANGLAGIP KADAYDI SBM DR. C. S. PANO

Cabugao, Ilocos Sur – Naangay ti Medical Mission ti ROPHEH (Reaching out to Peoples Health Through Entrusted Hands) Medical Mission Group babaen iti  panangesponsor ti Pamilia daydi nag-SBM Dr. Carlito S. Pano ken iti  pannakikammayetna iti  Local Government Unit (LGU)-Cabugao nga idaluan ni Mayor Edgardo “Ediboy” S. Cobangbang, Jr.


Idi Mayo 2, 2015, nasapa a nagturong dagiti nagpaagas iti Cabugao Cultural and Sports Complex, Brgy. Rizal, Cabugao, Ilocos Sur ket nadagdagus met nga inrehistro dagiti RHU Personnel a nagserbisio  kadagiti naituding a lamisaan.

Naigannuat  ti Medical Mission idi Mayo 2-3, 2015. Imbatad  ti anak a lalaki daydi SB Member Dr. Carlito S. Pano, nag-Committee Chair on Health  ken nakaidatonan ti medical mission iti Anibersariona/lagipna  a sigsigud a  mangipapaay ti Medical Mission ditoy ili ti Cabugao iti kallabes a tawen ti ROPHEH.


Iti pannaki-amad ti Web In-Action kadagiti Medical Staff and Personnel a nangtarawidwid iti panagagas, nairehistro  dagiti nagpaagas iti benneg ti  Medical,  (saan unay a nadagsen a sakit), Urinalysis, Blood Typing   ken kaaduan iti bilang ti ubbing  a nagpa-Circumcision iti dayta nga umuna nga aldaw.

Ti pannakaitandudo ti sapasap a salun-at kadagiti umili ket prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken pakaseknan dagiti naayat a gunglo-sibiko  a mangipapaay ti libre a  serbisio iti salinong ti LGU tapno agtultuloy a naragsak dagiti umili a mangsagrap iti gin-awa  nga itden ti agtultuloy a panagdur-as ti ili. # (Web In-Action) 

No comments:

Post a Comment