Friday, May 8, 2015

PROJECT PROPOSAL TI FFS-TUROD, MAKATULONG KADAGITI MANNALON

Cabugao, Ilocos Sur – Inaprobaran ti Local Chief Executive ti Cabugao, Ilocos Sur iti Project Proposal and Training Design a mangipaay iti panagadal (aktual ken teoria) kadagiti mannalon iti Barangay Turod, Cabugao, Ilocos Sur ita a panagtatalon (Wet Season 2015).

Daytoy a proyekto ket pagkammayetan pay ti LGU-Cabugao,  ti DA-RFO 1, Agriculture Training Insitutte, OPAG-Ilocos Sur ken imatonan ti DA-LGU Cabugao.

Ti Season-Long Farmers-Field School:  Sustainable Rice Production ket addaan ti 25  a mannalon nga agadal ken agaassideg ti taltalonda ket agadalda iti 18-20  a lawas (June 2015-October 2015).

Ti kangrunaan a panggep daytoy a panagadal ket tapno aktual a maipasagepsep kadagiti mannalon ti kaipapanan dagiti kabaruanan a Teknolohia ti pagay, maibaba iti gastos dagiti mannalon ken maingato ti matgedanda. Mainayon pay iti pannakatakuat ti kabaelan  dagiti mannalon a makabael nga agbalin a “Farm Extensionists” a katulongan ti Gobierno Lokal a mangipakat kaadagiti programa.

Kabayatanna, agtultuloy met iti napinget a pannakitinnulong ni SBM Benedicto M. Savellano, Committee Chair on Agriculture, Fisheries and Cooperatives a mangipatungpal kadagiti nagun-od ti LGU-Cabugao a programa ken pagsayaatan  para kadagiti mannalon. 

Daytoy a programa ket esponsoran ti DA-RFO 1, OPAG-Ilocos Sur, Agricultural Training Institute (ATI), Sta. Barbara, Pangasinan  ken iti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno masustener iti pannakaidur-as iti kaammuan ken panagbiag dagiti mannalon nangruna kadagiti barangay a pakaipakatan dagiti kabaruanan a wagas ti panagmula ti pagay. # (Web In-Action)

No comments:

Post a Comment