Cabugao, Ilocos Sur – Naaramid ti panagbisita ni Vice President Jejomar C. Binay a kaduana ni Congressman Sherwin Gatchalian iti Valenzuela City iti ili ti Cabugao, Ilocos Sur kas paset iti Itinerary Visit ti maikadua a kangatuan nga Opisial ti pagilian iti Ilocos idi Mayo 7, 2015.
Immuna a dimteng ni Congressman Gatchalian ket sinabat ti Pamilia-LGU iti sango ti Presidencia (Municipal Hall) babaen iti panangidaulo da Mayor Edgardo “Ediboy” S. Cobangbang, Jr. ken ni Vice Mayor DJ Savellano agraman dagiti Konsehales ti ili.
Nabara ti panangsarabo dagiti umili a magagaran a makipaset iti idadateng dagiti bisita ket naaramid ti ababa a programa iti Barangay Rizal Parke iti daya ti Munisipio a no sadino a ditoy ket nagtitiponan dagiti Opisiales ken kameng ti Federated Senior Citizens ti ili a Cabugao nga idauluan da Mr. Bonifacio Somera, Presidente ken ni OSCA Head Remigio Sunico.
Nakiragup met dagiti Kapitanes ken Opisiales ti 33 a barangay ti ili, dadduma pay nga organisasion kas iti Alpha Phi Omega (APO) Fraternity ken dagiti umili ti Cabugao, Ilocos Sur a nangimatang iti idadateng ni VP Binay.
Binayabay da Gov. Ryan Luis V. Singson; Vice Gov. DV Savellano; Congressman Ronald V. Singson; Ms. Cory Quirino; SP Members Jeremias Singson, Edgar Yabes ken ni Constante Oandasan iti idadateng ni VP Binay ken ti grupona ket indauluan met ni Mayor Ediboy ti Gobierno Lokal a simmabat iti nasao nga Opisial.
Innayon ni Mayor Ediboy a paset ti panagbisita ni VP Binay ken ni Rep. Gatchalian iti pannakipagkitada met kadagiti umili ken Opisiales ti ili partikular kadagiti Senior Citizens.
Nagpaay a nangiturong iti programa ni Mayor Ediboy ket kimmablaaw iti amin a naitaripnong agraman kadagiti Opisiales ti Probinsia ken ti ili ken nagyaman iti idadateng dagiti nadakamat a dua nga Opisiales ditoy Cabugao.
Iti panagsarita ni Congressman Gatchalian, inikkanna ti importansia ken pateg ti edukasion a panglaban iti kinakurapay. Maysa met kadagiti itantandudona iti pannakaragpat koma dagiti umili iti nasayaat nga edukasion.
Kangrunaan a dinakamat ni VP Binay iti panagsaritana iti Sisterhood Relationship iti nagbaetan ti ili a Cabugao ken iti Siudad ti Makati a naaramid idi Tawen 2013. Indasigna ti Makati City a kas pagwadan ken naprogreso nga ili ket panggepna pay ti tumulong iti ili ti Cabugao kas iti pannakaited ti 1 Million a tulong iti nadidigraan iti bagyo; pannakaited ti wheelchair kadagiti senior citizen ken dadduma pay a ramit a kasapulan iti pasdek ti Senior Citizen’s Center ti ili.
Innayon pay ti Bise Presidente a posible pay a makatulongda maipapan iti libre a panagbasa dagiti agtarigagay nga umili ken iti pannakaagas kadagiti sakit.
Kalpasan ti programa, nagyaman manen ni Mayor Ediboy kadagiti amin a timmabuno iti daytoy a panagbisita da VP Binay ken ni Diputado Gatchalian. # (Web In-Action)
No comments:
Post a Comment