AGPAAGAS ITI RHU ITI 2015, AGTULTULOY KEN UMAD-ADU

Cabugao, Ilocos Sur – Iti pannakiuman ti Web In-Action idi Enero 12, 2015, impakaammo dagiti Medical Personnel ti Rural Health Unit (RHU)-Cabugao nga agtultuloy ken umad-adu ti agpaagas iti Balay- Pagagasan ti ili a kas iti benneg ti Medical, Dental, Pre-Natal, BP Check-up, pabakuna ti ubbing, maladaga, ken masikog, kasta met dagiti agpaagas nga agtutubo, agkabannuag ken nataengan a nangrugi iti Enero  2015.

Iti sabali a bangir, agtultuloy latta met iti panagtignay dagiti kameng ti “Kalusugan Pangkalahatan” a programa  kadagiti barangay a buklen dagiti Brgy. Health Workers (BHW’s), Committee Chair on Health (Kagawad) a baybayabayen dagiti pannakabagi ti MHO tapno maaywanan ti seguridad ti salun-at dagiti agindeg ditoy babaen iti itutulong ti Munisipio.

Dagitoy nga inisiatiba ket resulta iti napintas a koordinasion dagiti mangimatmaton iti Sektor ti Salun-at ken iti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy a pannakatagiben ti salun-at dagiti umili a kakibin iti nabuslon a panagdur-as ti ili. # (Web In-Action)