Cabugao, Ilocos Sur – Naaramid ti Emergency Meeting dagiti Miembros ti Cabugao Ilocos Sur Tricycle Operators Drivers Association, Incorporated (CISTODAI) nga inatendaran da Mayor Edgardo “Ediboy” S. Cobangbang, Jr. ken ni Chief of Police PCI William N. Nerona iti Cabugao Municipal Police Station idi Enero 20, 2015 iti Cabugao Cultural and Sports Complex, Brgy. Rizal, Cabugao, Ilocos Sur.
Naulit a naigunamgunam b abaen iti Ama ti ili kadagiti pakaseknan ti Linteg-Trapiko kas iti panagrota, agtultuloy a disiplina dagiti miembros nga agpasada nangruna unay iti naan-anay a panangtungpal iti kaadda ti lisensiada nga agpasada ken kanayon a panagtungpal iti mapagnunumuan a pagparkingan ken kanaigna a pagsayaatan daytoy a sektor a kangrunaanna idiay Tiendaan (NISTC Public Market).
Innayon ni Mayor Ediboy a kasapulan iti naan-anay a panagtungpal iti Linteg-Trapiko dagiti Driver/Operator ti traysikelan ket isuda a mismo ti agsasarita ken agtutulag iti uneg ti asosasionda iti Pederasion ken Barangay-based ket no adda maaramidanda ket ipakitada a mapasayaatda ti rekordda kasta metten iti panangtungpalda kadagiti paglintegan a naituyang a para kadakuada ket maadal no mayannatup a maited dagiti kalikagumda.
Insupusop ni Mayor Ediboy nga adalen ti Munisipio dagiti mainayon pay a pagimbagan a maisangrat para kadagiti transport group iti ili iti masakbayan.
Iti agdama, ti CISTODAI ket buklen ti ag-900 a kameng iti 33 a barangay ti ili. Maibasar iti rekordda, adda 583 nga aktibo a kameng ti Saranay-da a mangipaay ti kasapulanda iti panawen ti emerhensia.
Impasingked pay ti Alkalde Munisipal a komkomplementaran ti Munisipio dagiti kalikagumda ngem kasapulan nga ipaneknekda a maidumada iti magapuanan kadagiti traysikelan iti kabangibang nga ili.
Nagsarita met ni Chief of Police PCI William N. Nerona iti pakaseknan ti naurnos a panagparking idiay Tiendaan (NISTC Public Market) ken iti panagserrek-panagruar dagiti lugan/traysikelan (Entry ken Exit) iti Merkado Publiko ti ili. # (Web In-Action)
No comments:
Post a Comment