Cabugao, Ilocos Sur – Malaksid kadagiti gagangay a sagubanit dagiti agpapaagas iti Rural Health Unit (RHU)-Cabugao, kaaduanna ti masikog nga inna nga ag-pre natal check-up tapno maipasigurado ti napintas a kasasaadda iti panagpasngayda inton madanonan ti kabulananda. Manamnama nga iti nasayud a koordinasion dagiti masikog kadagiti agrebbeng iti RHU ket ma-update ti rekord-da a kasapulan dagiti Medical Personnel iti Lying-in Center.
Kanaig daytoy, inaldaw ti pannakaipan dagiti agbakuna nga ubbing ken maladaga para iti mayataday a pangprebentar ti sakit. Dagitoy ket maik-ikkan ti importansia babaen iti agtultuloy a panangilungalong dagiti maseknan a Medical Personnel iti MHO-RHU Cabugao nga idauluan ni Dr. Bernardino P. De Gracia, Municipal Health Officer, LGU-Cabugao kasta metten iti tignay ti Sangguniang Bayan nga imatonan ni Health Committee Chair, SBM Atty. Bryann Jett S. Pano.
Daytoy nga inisiatiba ket resulta iti agtultuloy a napintas a koordinasion iti amin a maseknan nga Opisina/Ahensia iti pannakapasayaat ti programa ti salun-at para iti amin nga umili babaen iti Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web In-Action)
No comments:
Post a Comment