Cabugao, Ilocos Sur – Iti pannakiuman ti Web In-Action ken ni Dr. Bernardino P. De Gracia, Municipal Health Officer iti Enero 5, 2015, kinunana nga awan ti nakaro a sakit a parnuayen ti panagbalbaliw ti klima ta malaksid a nalaing a sumarungkar dagiti umili iti Rural Health Unit (RHU)-Cabugao, dakkel ti maitulong ti kanayon a pannakapalagip ken pannakaadal dagiti agindeg iti barangay iti panangmantener iti napintas a salun-at babaen kadagiti nagkakammayet a sanga ti Gobierno kas iti DOH-MHO, DSWD-MSWDO, ken dagiti Asosasion nga adda iti salinong ti Barangay a mangiprompromot ti programa ti salun-at.
Kabayatanna, agtultuloy ti ipapan dagiti umili iti RHU ket madagdagus ti pannakaasikasoda ken madadaan a maited dagiti agas a kasapulanda babaen iti agtultuloy a panangsuporta ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagiti health programs ti Munisipio tapno agtultuloy a masalakniban ti salun-at dagiti umili. # (Web In-Action)
No comments:
Post a Comment