Cabugao, Ilocos Sur – Agtultuloy ti napasnek a pannakaited ti serbisio nga ipatpatungpal ti Cabugao Waterworks System nga idauluan ni Engr. Nestor Somera, Waterworks Superintendent mangrugi manen iti Tawen 2015.
Iti pannaki-amad ti Web In-Action iti Enero15, 2015, imbatad dagiti linemen ti waterworks a maiwaywayat ti pannakatarimaan dagiti sumagmamano a nagperdi a distribution line ti Poblasion. Nupay kasta, awan unay ti problema dagiti main line ket naannayas ti panagusar dagiti consumers ti danum. No adda problema a tumaud iti linia ti danum, dagus a maaksionan babaen ti panangipakaammoda iti Hotline Number ket agaktuar a dagus ti puersa ti Waterworks Department.
Kanaig daytoy, imbatad ni Engr. Nestor B. Somera a mantenerenda pay ti napintas a koordinasion kadagiti maseknan nga Ahensia wenno indibidual a makadalapus kadagiti linia ti danum tapno maliklikan ti pannakaperdi dagiti tubo tapno naannayas latta ti taray ti danum.
Kabayatanna, naisamira met a naaramid ti Cleaning ti Water Reservoir iti Barangay Lipit ken naaramid ti Clearing Operation iti main line iti Magarang Spring Source kasta metten iti linia ti Roma-Kinalian Sources iti daya.
Ti pannakaited ti agtultuloy a serbisio kadagiti umili iti maipaay a nalinis a mainum ken mausar a danum kasta met ti regular a mentenansia ti pasilidad ti water system ket prayoridad pay a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. para iti pagimbagan ti sapasap. # (Web In-Action)
No comments:
Post a Comment