Cabugao, Ilocos Sur – Naangay ti Cutting of Ribbon ken pannakabendision iti baro a pasdek ti Sangguniang Bayan Hall a naaramid iti amianan ti Municipal Hall Building iti Enero 16, 2015 a no sadino a ditoy ket dinar-ayan dagiti umili ti Cabugao, Kakapitanes ti 33 a Barangay, Department/Section Heads ken Empleado ti Munisipio, Bisita, Sangguniang Bayan Members ken dagiti Opisiales ti LGU-Cabugao ken Gobierno Proibinsial nga indauluan da Mayor Edgardo “Ediboy” S. Cobangbang, Jr. ken ni Governor Ryan Luis V. Singson kas panagsaganadda. Immuna a naangay ti Cutting of Ribbon ket binayabay ni Mayor Ediboy ni Governor Ryan iti pannakagetteng ti laso iti pannakaisibro ti nasao a pasdek.
Simmaruno ti panangidaulo ni Rev. Fr. Ramil Rigunay, Assistant Parish Priest, Cabugao Catholic Church iti panagkararag sa nabendisionan dagiti paset ti pasdek iti 1st Floor ken iti 2nd Floor ti SB Hall ket indauluan da Governor Ryan, Mayor Ediboy ken ni Vice Mayor DJ ti grupo a nangbayabay ken ni Fr. Rigunay nga immuli iti nasao a pasdek.
Nangited ti Mensahe ni Vice Mayor DJ. Kimmablaaw ken nagyaman iti amin a timmaripnong iti daytoy a seremonia. Pinagyamanan ti Bise Mayor ti Gobernador iti agtultuloy a panagtalekna iti Cabugao ket impanamnamana a gumaget dagiti Konsehales nga aramidenda dagiti pagrebbenganda a nangruna iti panagaramidan ti Ordinansa a mangpasayaat ti ili ken kabibiag dagiti umili.
Simmaruno a nangited ti Mensahe ni Mayor Ediboy. Kimmablaaw ken nagyaman iti amin a timmabuno iti daytoy a seremonia. Dinakamat ti Ama ti Ili no kasano a napaadda ti SB Hall babaen iti itutulong ti Gobierno Probinsial nga idauluan ni Governor Ryan. Impeksa ni Mayor Ediboy ti namnamana iti agtultuloy a pannakapanday dagiti nasasayaat a paglintegan a maipaay a pagsayaatan dagiti umili ket kinablaawanna dagiti agpampanday ti linteg ti ili nga idauluan ni Vice Mayor DJ ta naaramid daytoy a napintas a pagpandayan ti linteg para iti agdama ken iti masakbayan a pakaisagutan dagiti umili ti Cabugao.
Nangited met ti Mensahena ni Governor Ryan ket kimmablaaw ken nagyaman kadagiti umili ti Cabugao nga idauluan da Mayor Ediboy ken ni Vice Mayor DJ. Impeksa ni Gov. Ryan ti panangbigbigna iti napardas a panagprogreso ti ili agsipud ta agtultuloy iti pannakibinnadangda kadagiti gannuat ti Gobernador ket kunana nga agbalin koma nga inspirasion dagiti agpampanday ti linteg iti pannakaited ti napintas a pagyananda ket sumaysayaat dagiti mapanday a linteg a maiserbi kadagiti umili ta agbalinda nga epektibo ken produktibo a lawmakers. Innayon ti Gobernador a maitulong iti dadduma a serbisio iti counterpart ti Munisipio kadagiti proyekto ket impanamnamana nga iti pannakaruk-at ti 20% Development Fund ti Probinsia ket saan nga agsarday ti pannakaited latta dagiti basic services ken panagannayas dagiti programa ti Kapitolio a pagimbagan dagiti barangay ken kaprobinsiaanna.
Kalpasan ti Inauguration and Blessing, nagitipon dagiti Opisiales ti Munisipio ken Probinsia iti 2nd Floor ti Sangguniang Bayan Hall.
Nagpaay nga Emcee ni SB Secretary Maxfel S. Suboc iti naaramid nga ababa a programa. # (Web In-Action)
No comments:
Post a Comment