ALS STUDENTS, AGAWATDA MANEN ITI AGBASA ITA A TAWEN 2015-2016

Cabugao, Ilocos Sur – Segun ken ni Mr. Warren Sumibcay, ALS Mobile Teacher, Cabugao Community ALS Center, South Central School, Brgy. Bonifacio, Cabugao, Ilocos Sur, a mangrugi manen nga agawatda ita  Enero 2015 iti umay agbasa iti nasao a programa ti DepED,  Alternative Learning System (ALS) para iti School Year 2015-1016.  Manamnama a maaramid ti recruitment iti 33 a barangay ti ili a papanan dagiti ALS Recruit Team nga idauluan ni Mr. Sumibcay.

Innayon ni Mr. Sumibcay a naregget ken determinado  dagiti 70 a bilang ti  nageksamen iti Final Qualifying Examination a naisayangkat itay Tawen 2014 ket manamnama a maruk-atan ti resultana iti bulan ti Marso 2015.

Inggunamgunam ni Mr. Sumibcay a mabalin pay a makipagkita dagiti interesado nga out of school youth wenno kayatna ti makaturpos iti kurso iti Accreditation and Equivalency Program ti DepED  a pakaturposanda  iti elementaria, high school ken iti vocational courses babaen iti pannakitinnulong ti Technical Education and  Skills Development Authority (TESDA) tapno maiyintek dagiti paglaingan dagiti agtutubo a basaenda ken  makatulong kadakuada para iti naraniag a masakbayanda. # (Web In-Action)