“SUN SOAKED ILOCOS SUR 2015”, MAANGAY ITI BARANGAY SABANG

Cabugao, Ilocos Sur –Maangay ti tallo nga aldaw, Enero  9-11, 2015 iti Surfing Competition idiay Barangay Sabang, Cabugao, Ilocos Sur babaen iti panangtarawidwid ti Philippine Surfing Federation, kasta metten ni Congressman Ronald V. Singson, First District, Ilocos Sur  ken ti Gobierno Probinsial ti Ilocos Sur nga idauluan da Governor Ryan Luis V. Singson ken ni Vice Gov. DV Savellano.

Iti Day 1, Enero 9, 2015, nagsangpet dagiti Surfers  a makipartisipar iti maiwayat  a salip iti Ilocos Sur Surfing Capital  a managan iti  Kido’s Point, Barangay Sabang, Cabugao, Ilocos Sur.

Kabayatanna, naaramid met ti Frisbee ken Volleyball Competition idiay Cabugao Beach Resort, Barangay Pug-os, Cabugao, Ilocos Sur iti dayta met la nga aldaw. Kangrunaan a nasangaili a nangtarabay iti paay-ayam ket ni Congressman Ronald V. Singson. Naaramid met ti Dragon Boat ken Kite Boarding idiay Puro, Magsingal, Ilocos Sur iti dayta met la a petsa. Dagitoy nga aktibidad ket isu ti nakabuklan iti “Sun Soaked Ilocos Sur Beach Festival 2015” a gannuat ni Congressman Ronald V. Singson ken iti Provincial Government ti Ilocos Sur.

Iti pannaki-amad ti Web In-Action kadagiti pumurok   iti Barangay Sabang, pinagyamananda dagiti Opisiales ti Barangay  iti panangidaulo ni Brgy. Captain Atilano Saquiton iti agtultuloy a  pannakadalus  ti dalanda, natunos a panagmulada ti kayo  a lumugar, kinatalna ti lugarda ken iti napintas a panangpasangbayda kadagiti dumayo iti barangayda.

“Agduduma ti Nationalities ti dadduma a  maisar-ong ditoy nangruna iti Holidays ket itatta  ket adda ragsak a magun-odmi iti pannakilangenmi kadakuada,” insupusop dagiti Opisiales a naka-On Duty  iti Barangay Hall.

“Pagyamananmi unay  iti LGU Cabugao babaen iti panangidaulo ni Mayor Edgardo “Ediboy” S. Cobangbang, Jr. iti agtultuloy a panangtarabay ken panangtulongda kadakami ditoy Barangay Sabang,” innayon dagiti bumarangay.

Nainayon a buya a mangpangayed iti sango ti Multipurpose Building ket iti naipasdek a “Catwalk” a  pagnaan nga agtunged iti pagburakan ti allon. Imbatad dagiti Surfers  a manam-ayanda ita ta addan  panglinteganda   a mapan  a tumapog iti asideg ti pagsanayanda/pagsasalipanda  a pagdalluyonan ti danum ti baybay. 

Iti aldaw ti  pasalip, nakikaysa dagiti kameng ti WASAR (Water Search and Rescue)-MDRRMC   nga idauluan ni Engr. Nestor B. Somera iti LGU-Cabugao kasta met iti First Aid Team ti RHU-Cabugao  agraman ti Kapolisan ken dagiti BPATS/Tanod iti nadakamat a barangay iti pannakatarabay dagiti agsasalip ken dagiti bisita ditoy a barangay. # (Web In-Action)