Monday, January 12, 2015

GAPUANAN/PAMMADAYAW A NAGUN-OD TI LGU-CABUGAO, NAAMMUAN

Cabugao, Ilocos Sur – Kalpasan ti Flag Ceremony iti LGU-Cabugao iti Enero 12, 2015 iti sango ti Municipal Hall, imbasa ni SB Secretary Maxfel S. Suboc ti linaon ti Resolusion ti Gobierno Probinsial a mangted ti Komendasion iti naited a Pammadayaw a “

Gawad Pagkilala”  manipud iti Bureau of Fisheries and Aquatic Resources (BFAR)  ket maysa ti ili a Cabugao kadagiti LGU’s  a pinadayawan ti nadakamat nga Ahensia maigapu iti aktibo a pannakipasetna kadagiti programa a mangitandudo iti panagbiag dagiti sektor dagiti mangngalap ken industria ti Pagikanan. 

Inawat ni Mayor Edgardo “Ediboy” S. Cobangbang, Jr. ti nasao a Pammadayaw iti imatang ti Pamilia-LGU iti dayta a gundaway.

Iti panagsarita ni Mayor Ediboy, kimmablaaw ken pinagyamananna   daytoy a naited iti LGU a pammadayaw. Innayonna a daytoy a nagun-od ket kolektibo a pannakigamulo iti nakaigapuanna ket maipaay ken agserbi a dayaw ti ili ken iti kaaduan iti nasao a gapuanan.


Dadduma pay a pammadayaw ken gapuanan a nagun-od ti LGU-Cabugao kas dinakamat ti Ama ti Ili ket dagiti sumaganad:

1.Panangbigbig dagiti Balikbayan iti agtultuloy a napintas a pannakapasangbayda/pannakilangen dagiti umili   kabayatan ti panagbakasionda ditoy ili a tinubuanda.

2.Pinadayawan ni Mayor Ediboy a kabuyog ti pammadayaw ti PNP iti Municipal Police Station ti ili a Cabugao, Ilocos Sur iti “Drug–related apprehensions” a nagapuanan ti Kapolisan iti ili iti agdama.

3.Pannakapadayaw ti dua a Personnel ti LGU-Cabugao iti pannakagun-odda iti Lisensia nga Agparti iti animal babaen iti pannakipasetda iti panagsanay nga insayangkat ti Gobierno Probinsial ken ti TESDA.


Kanaig daytoy, insupusop pay ti Alkalde Munisipal a pagrebbengan ti tuggal umili nga ipakaammo iti kaaduan ti pateg ti  programa ti TESDA tapno matulongan dagiti agkasapulan iti kabaelan ken panggedan tapno sumayaat pay  ti panagbiag ti kaaduan.

Indagadag pay ti Hepe Ehekutibo iti naan-anay a panangprobitsar dagiti umili kadagiti maidiaya a serbisio ken oportunidad a nabiit a matun-oyan manipud kadagiti nadumaduma nga Ahensia ken Opisina ti Gobierno tapno mainayon a pagsayaatan ti kaaduan ken pakabenepisiaran met iti sapasap nga umili ti Cabugao, Ilocos Sur. # (Web In-Action)

No comments:

Post a Comment