Monday, August 3, 2015

6-DAY TRAINING NGA IWAYAT TI PSA, NARUGIAN DITOY CABUGAO

Cabugao, Ilocos Sur – Maangay ti 6-Day Training dagiti 34 nga Enumerators (agcensus) ti ili a Cabugao, Ilocos Sur iti Municipal Conference Building ditoy nga ili a mangrugi iti Agosto 3 agingga iti Agosto 8, 2015 babaen iti panangigannuat ti Philippine Statistics Authority (PSA) babaen ti mandato ti Republic Act 10625  wenno Philippine Statistical Act of 2013. 


Kalpasan ti nasao a panagsanay, maideployto  dagitoy a Trainees mangrugi inton  Agosto 10 agingga iti Setiembre 6, 2015 babaen ti panangtarabay  ti PSA ken ti LGU-Cabugao.

Iti panangrugi ti panagsanay, naaramid ti ababa a programa. Kalpasan ti Invocation ken Acknowledgment of Participants, nangipaay ti Mensahe ni Mayor Edgardo “Ediboy” S. Cobangbang, Jr. 

Kimmablaaw iti amin ken nagyaman   ni Mayor Ediboy kadaytoy a naited a gundaway kadagiti kailianna a makipaset iti trabaho nga igannuat ti Philippine Statistics  Authority  (PSA). Pinabileg ti Ama ti ili dagiti Trainees nga ipamatmatda ti kabaelanda nga agtrabaho agsipud ta itaktakderda ti nagan ti ilida kadaytoy a maipaakem kadakuada.


Impalagip   ti Ama ti Ili a nadayaw ken napintas ti  pannakilangenda kadagiti klienteda  a kasapulan daytoy a kasasaad iti trabahoda.
Naisaganad ti Orientation a pakabuklanna  ti Overview of POPCEN 2015; Purpose of the Training; ken Discussion of Schedule.

Iti Training Proper, naibinsa ti Enumerator’s Manual a sinagudayna  ti Introduction; The Role of Census Enumerator ken ti Census Concepts and Definition para iti Day 1, Agosto 3, 2015.
Naglektiur dagiti PSA Staff nga idauluan ni Mr. Melchor Saliganan Bautista, Supervisor.

Nagsarita met ni Vice Mayor DJ Savellano ken nakikaysa dagiti kakaduana iti Konseho Munisipal iti rugi ti panagsanay. Nakipaset met Day 1 ti panagsanay ni Mrs. Rosario S. Abara, Municipal Civil Registrar ti ili a Cabugao. # (Web In-Action) 

No comments:

Post a Comment