Wednesday, August 26, 2015

ILOCOS SUR, SAAN LAENG A PANG-TURISMO, PANG- SPORTS PAY

Saan laeng a ti programa ti turismo ken agrikultura ti ipangpangruna ti provincial government, no di pay ti pakaseknan ti sports tapno makapataud ti ad-adu pay nga atleta nga Ilokano ken maaddaan dagiti agtutubo iti nasalun-at a bagi ken panunot tapno makatulongda iti panagdur-as ti Ilocos Sur.

Daytoy ti kinuna ni Gob. Ryan Singson bayat ti naangay a press conference iti Kapitolio idi naipresentar dagiti estudiante a gold medalists kadagiti naisayangkat a Karatedo National Competitions itay nabiit.

Nangisayangkat ti gobierno probinsial babaen pay  iti suporta ni  Congressman Ronald Singson ti Basketball Tournament ti nadumaduma nga ili iti probinsia tapno matarabay dagiti agtutubo iti seknan ti “self- discipline, team work ken sportsmanship”, kinuna ni Gob. Singson.

Ti nagkampeon iti maikadua a distrito iti Gov. Ryan’s Basketball Cup a ti Sta, Cruz Forward March Team ket kasangona ti nagkampeon iti  Cong. Ronald Singson’s  Basketball Cup iti umuna a distrito- ti Magsingal Agrimat Team para iti “Battle of Champions”.

Ti grand champion, umawat iti  P150,000 ken tropeo, ti 1st runner-up, umawat iti P100,000 ken tropeo ken 2nd runner-up P50,000. Ti mapili nga MVP (Most Valuable Player) umawat iti P10,000 ken plake ti pammigbig.

Malaksid iti agtinawen a Basketball Tournament a nangrugi itay Hulio, naisayangkat pay ti 1st Governor’s Cup Volleyball Tournament (Men and Women Division)  gapu iti impluensia ti naangay  idi a Philippine Super Liga iti People’s Stadium iti Sto. Domingo  idi Oktobre 2014 a nagay-ayaman dagiti national volleyball players.

“Daytoy ti nakapanunotan a mangisayangkat pay iti probinsia ti Volleyball Tournament malaksid laeng iti Basketball tapno makapataud tayo kadagiti nalalaing nga atleta a mabalin nga ilaban kadagiti regional wenno national tournaments,” kinuna ni Gob. Ryan.

Paset daytoy iti sports development program ti provincial government babaen ken ni Sports Coordinator Marius Corpuz para kadagiti agtutubo nga agtawen iti 25 agpababa tapno maipaganetget kadakuada ti nasalun-at a panagbiag babaen iti tulong ti sports.

Kinuna pay ti Gobernador a 90 porsiento a dandanin makumpleto ti mapadpadur-as ken mapa-moderno a Quirino Stadium tapno agserbi daytoy a pakaangayan dagiti   provincial, regional ken national sports competitions.

“Amangan no malpasto daytoy modern nga  Quirino Stadium, mabalinton nga ag-host iti Ilocos Sur iti Palarong Pambansa  ta addanto dagiti modern sports equipment ken mabangon ti dormitory dagiti atleta iti abay ti stadium,” kuna ni Gob. Ryan.

Mapadur-as pay ti sports a swimming ta addanto mabangon a swimming pool iti Stadium ta kadagiti naglabas nga Ilocos Region Athletic Association (IRAA) Meet awan pay dagiti atleta tayo iti swimming ken archery.

Kinunana pay a mangidiaya ti provincial government iti sports scholarship kadagiti atleta a pakairamanan dagiti out-of-school youths. # Source - (JCR/Ben P. Pacris/PIA-1 Ilocos Sur).

No comments:

Post a Comment