Wednesday, August 26, 2015

NAGSAGANA TI MDRRMC ITI ILALASAT NI “BAGYO INENG!”

Cabugao, Ilocos Sur – Sakbay ken kalpasan a naibayog ti pagsignalan ti Bagyo Ineng iti Kailokuan,  nagtignay ti puersa ti Municipal Disaster Risk Reduction  and Management Council (MDRRMC) ti Cabugao   nga ibagian  da Engr. Nestor B. Somera. MDRRMC Officer  iti panagmonitorda ken dagiti kakaduana kadagiti calamity prone areas (inland ken coastal area)  tapno mamakdaarda ken maaramid ti information drive maipapan iti ilalasat ti didigra.

Naisagana pay dagiti maaramat a lugan ken kanaigna a ramit ket naiprepararda iti MDRRMC Operation Center iti Munisipio.

Iti pannakiuman ti Web In-Action idi Agosto 25, 2015, imbatad ni Engr. Nestor B. Somera a malaksid iti panangalertoda kadagiti kakaduada a mangbukel ti MDRRMC iti Munisipio nga agmobilisar/agmonitor  manipud iti aw-away agingga iti Poblasion, naidagadag pay ti panagmonitorda kadagiti kalsada ken iti National Highway a masakupan ken mabatogan ti ili.

Kanaig daytoy, innayon pay ni Engr. Somera nga aramidenda ti naan-anay a pannaki-koordinar kadagiti dadduma  a Departamento ti Opisina ti LGU a maseknan no dumteng ti kalamidad  tapno naan-annayas ti panagrespondeda a mangaksion kadagiti pakaseknan dagiti umili. Iti Agosto 24, 2015, nasuspende ti klase ti amin a pagadalan iti Munisipalidad gapu iti pannakarikna ti kaadda pay laeng  ti Bagyo Ineng iti lokalidad.

Nupay kasta, iti naurnong a datos ti report kadagiti barangay ken disaster prone area, awan ti naireport a  nadidigraan a pamilia ket adda laeng sumagmamano a disso ti nadadael ngem naaksionan daras babaen iti pannakitinnulong ti MDRRMC kadagiti maseknan nga Ahensia.

Dagitoy nga aksion ken inisiatiba ket gubuayen ti napartak a panangipatungpal ti pagrebbengan iti panawen ti emerhensia tapno maprotektaran dagiti umili babaen iti panangikalikagum ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno mapakadaan ken maalay-ayan  ti epekto dagiti dumteng a kalamidad no adda man. # (Web In-Action)

No comments:

Post a Comment