Wednesday, August 26, 2015

NATIONAL CHILD DEVELOPMENT CENTER, MAIPASDEK DITOY CABUGAO

Cabugao, Ilocos Sur – Naaramid ti panagpirma iti biang ti LGU-Cabugao ken iti Early Childhood Care  and Development Council (ECCDC), Attached Agency ti DepED a mangipaay ti proyekto ti National Child  Development Center iti ili a Cabugao nga aggatad iti 2.3 Million a Pisos daytoy a mabangon a pasdek a maidisso iti lote ti Munisipio.


Naaramid ti pannakapirma ti Memorandum of Agreement (MOA) idi Agosto 21, 2015 iti Opisina ti Municipal Chief Executive babaen kada Mayor Edgardo S. Cobangbang, Jr. ken ni Engr. John Miranda, Technical Officer ti ECCDC a nang-validate pay ti project site ti nasao a proyekto ti child development center. Inimatangan dagiti Opisiales ti ili ken Munisipio iti dayta a petsa ti nasao a signing ceremony.

Sakbayna, inikkan ti Sangguniang Bayan ti ili iti autoridad ti Municipal Mayor a sumrek iti katulagan para iti pannakaipasdek ti maysa a sentro para kadagiti ubbing ditoy nga ili.


Sagudayen ti resolusion ti Sangguniang Bayan, naited ti autoridad ken ni Mayor Edgardo S. Cobangbang, Jr. a sumrek babaen iti Memorandum of Agreement ken ni Executive Director ti Early Child Good Care and Development Council Teresita Inchong para iti pannakaipatakder ti National Child Development Center ditoy nga ili.

Iti pannakiuman ti Web In-Action ken ni Engr. Miranda ket kinunana nga iti dagup ti 1,700 a Munisipalidad iti intero a Pilipinas, ti ili ti Cabugao ti maysa kadagiti napili iti umuna a 600 a Munisipalidad a pakaaramidan ti  Proyekto ti DepED. # (Web In- Action)

No comments:

Post a Comment