Wednesday, August 12, 2015

UMAD-ADU TI MATALON ITI WET SEASON 2015

Cabugao, Ilocos Sur – Iti panakaisar-ong ti Web In-Action kadagiti barangay ti Munisipalidad, naammuan kadagiti mannalon nga iti panagbuslon ti tudo iti kangrunaan a nagbatayanda iti panangpalawada ti matalonda  iti  Wet Season 2015 (Hunio-Nobiembre). Naammuan pay a kaaduan ita iti manam-ayan iti kaadda ti naited kadakuada a libre a  bukel ti Ryan Rice ken Organic Fertilizer iti dadduma a mannalon    babaen iti programa ti Gobierno Munisipal ken ti DA-RFO 1  a mausar iti panagbunubonda ken an-anayanda metten a mausar iti panagpadakkeldanto  iti mairaepda.

Kinuna ni Municipal Rice Program Coordinator Mr. Nereo S. Daproza nga addan ti 1,100 ektaria ti natalon iti irrigated area ken 100 ektaria met iti rainfed area iti  intero a Munisipalidad iti agdama.

Dagitoy nga aksion ken inisiatiba ket gubuay ti napintek a programa iti Agrikultura  ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno makomplementaran ti regta dagiti mannalon nga agpataud ti umanay a suplay a pagtaraon dagiti umili ken mangnayon  ti masapulanda agsipud ta mayoridad dagiti umili ti agdepende iti kangrunaan a  pagbiaganda iti Agrikultura ditoy nga ili. # (Web Situational Report)

No comments:

Post a Comment