Tuesday, August 11, 2015

MATH CLASS MANEN, UMUNA A SABADO TI SCHOOL YEAR 2015-2016

Cabugao, Ilocos Sur – Segun kadagiti Nagannak/Guardians a napan nagbantay idi Agosto 8, 2015  ket saan a panagtaktak ti panagsakripisioda a mangbantay ken mangtarabay kadagiti annakda iti maang-angay a Math Class kadagiti pageskuelaan ti Cabugao DepED District iti intero a Munisipalidad ti Cabugao ita a bulan ti Agosto 2015. Dagiti dua a dadakkel a pageskuelaan  a pakaangayan ti nasao a Math Class ket   iti Cabugao North Central School ken iti Cabugao South Central School a pannakasentro dagiti pageskuelaan.

Iti pannakiuman ti Web In-Action idi Agosto 8, 2015, imbatad dagiti kaaduan a nagannak kadagiti napili nga ubbing a naanus a nagbantay iti ruar iti klase a maragragsakanda ta maipamaysa a masanay dagiti annakda iti Subject a Math ken manayonan ti panagtalek dagiti ubbing kadagiti bagbagida gapu ta adda pakaidumaanda a kabaelan iti kaaduan a kaeskuelaanda.

Kadagiti met ubbing a nairaman kadaytoy a panagsanay ket kayatda met a takuatan ti kabaelanda ken maibilang a parte ti pannakadisiplinada daytoy nga aktibidad nga iwayat ti DepED.

Innayon dagiti mangisursuro a nupay silulukat daytoy a pagenrolan dagiti interesado nga ubbing ken nagannak, maobserbaran  a kaaduan kadagiti nagenrol ken agdama nga agbasbasa ket pagduyosanda ti Matematika ken isuda ti kaaduan a nalaing iti klaseda iti pageskuelaanda nangruna iti Science Subject ken isuda pay ti kaaduan a maikonkontes iti sabali nga asignatura iti Distrito ken iti Division Level. # (Web In-Action)

No comments:

Post a Comment